کراچی (شوبز ڈیسک) پاکستانی اکیڈمی سلیکشن کمیٹی کے چیئرمین محمد علی نقوی نے آسکر اکیڈمی ایوارڈز کے لئے پاکستان سے فلموں کے انتخاب کے لیے کمیٹی اراکین کا اعلان کردیا۔اس سال کی پاکستانی اکیڈمی سلیکشن کمیٹی میں مصنفہ فاطمہ بھٹو، فلمساز بلال لاشاری اور اداکار فواد خان شامل ہیں۔نومنتخب چیئرمین، فلمساز محمد علی نقوی نے رواں ہفتے جاری کردہ ایک پریس ریلیز کے ذریعے نئی تقرریوں کا اعلان کیا۔
کمیٹی کو اکیڈمی ایوارڈز کی بہترین غیر ملکی زبان کی فلم کیٹیگری کے لیے پاکستان کی باضابطہ انٹری کا انتخاب کرنا ہے، جس کے لئے آئندہ ماہ کمیٹی فلموں کا جائزہ لیگی۔پاکستانی اکیڈمی سلیکشن کمیٹی میں پاکستانی سنیما کے بہترین اور کامیاب افراد شامل کیے گئے ہیں جن میں چیئرمین محمد علی نقوی، ‘دی لیجنڈ آف مولاجٹ’ کے ہدایتکار بلال لاشاری، اداکار فواد خان، اداکار احمد علی اکبر، اداکارہ، نادیہ افگن، مصنفہ فاطمہ بھٹو، ہدایتکارہ مہرین جبار، دستاویزی فلم ساز حیا فاطمہ، ہدایتکار صائم صادق، سماجی کارکن فریحہ الطاف اور دستاویزی فلم ساز مدیحہ سید شامل ہیں۔
