اسلام آباد: (شوبز ویب ڈیسک) پاکستان کے نامور گلوکار و موسیقار ساحر علی بگا نے کہا ہے کہ گلوکار راحت فتح علی خان موسیقی کی دھنوں سے مکمل انصاف کرتے ہیں۔
ایک انٹرویو میں بات کرتے ہوئے موسیقار ساحر علی بگا نے کہا کہ مجھے سب سے زیادہ مزہ راحت فتح علی خان کے ساتھ کام کرنے میں آتا ہے کیوں کہ وہ موسیقی کی تیار کردہ دُھن کے ساتھ مکمل انصاف کرتے ہیں۔
ان کا کہنا تھا کہ راحت اتنے بڑے گلوکار ہونے کے باوجود تیار کی گئی دُھن میں اپنی مرضی سے کوئی تبدیلی نہیں کرتے اور اگر انہیں کچھ تبدیل کرنے کی ضرورت محسوس ہوتی ہے تو وہ موسیقار سے مشورہ کرتے ہیں۔
ساحر علی بگا نے کہا کہ مجھے میوزک کنسرٹ اور ڈراموں کے مقابلے فلموں کے لیے گانے تیار کرنا اچھا لگتا ہے اور میری اوّلین ترجیح سینما کے لیے گانے بنانا ہے، مجھے گلوکاری سے زیادہ موسیقی ترتیب دینے کی لگن رہتی ہے۔
انہوں نے کہا کہ مجھے موسیقی اور دھن تیار کرنے میں مزہ آتا ہے اور جب دھن تیار کرلیتا ہوں تب فیصلہ کرتا ہوں کہ موسیقی کو کون گلوکار اچھے طریقے سے گا سکتا ہے۔
ان کا مزید کہنا تھا کہ میں موسیقی تیار کرنے کے بعد بڑے یا چھوٹے گلوکار کی تفریق کیے بغیر یہ فیصلہ کرتا ہوں کہ اپنی دھن کس گلوکار کو دینی چاہیے،محنت کرکے دھن تیار کرتا ہوں لیکن اس کے بعد ایک لمحے کے لیے بھی یہ تصور نہیں کرتا کہ مذکورہ گانا مجھے خود گانا چاہیے۔
