رانا مشہود، آپ ارشد ندیم کو عزت دیں کیونکہ انہوں نے عالمی سطح پر قوم کا سر فخر سے بُلند کیا ہے، آپ اور آپکے وزیراعظم تو صرف اپنی جیب بھرنے میں مصروف ہیں : اداکارہ
لاہور ( شوبز ڈیسک ) پاکستانی شوبز انڈسٹری کی معروف اداکارہ و ماڈل کرن ملک نے پیرس اولمپکس میں گولڈ میڈل جیتنے والے ارشد ندیم کی کامیابی کا کریڈٹ لینے پر وزیراعظم شہباز شریف کو کڑی تنقید کا نشانہ بنایا۔ فرانس کے دارالحکومت پیرس میں کھیلنے جارہے اولمپکس کے جیولین تھرو ایونٹ میں ارشد ندیم نے ایونٹ کا ریکارڈ توڑتے ہوئے سونے کا تمغہ اپنے نام کیا، ارشد ندیم 92.97 میٹر طویل تھرو کے ذریعے پاکستانی قوم کی امیدوں پر پورے اترے اور اولمپکس میں نیا ریکارڈ بنایا۔
ارشد ندیم کی تاریخی فتح نے جہاں پوری قوم کا سر فخر سے بُلند کیا تو وہیں اس موقع پر وزیراعظم شہباز شریف کی جشن منانے کی ویڈیو بھی سوشل میڈیا پر وائرل ہوئی۔ مذکورہ ویڈیو میں وزیراعظم شہباز شریف کے ساتھ ان کے مشیر امور نوجوانان رانا مشہود بھی موجود تھے، جیسے ہی ارشد ندیم نے ریکارڈ بنایا تو رانا مشہود کو ارشد ندیم کی جیت کا کریڈٹ شہباز شریف کو دیتے ہوئے کہتے سنا گیا کہ وزیراعظم صاحب یہ آپ کا ویژن تھا۔
وزیراعظم شہباز شریف کی یہ ویڈیو جیسے ہی سوشل میڈیا پر وائرل ہوئی تو صارفین سمیت شوبز شخصیات نے اُنہیں سخت تنقید کا نشانہ بنایا۔ اداکارہ و ماڈل کرن ملک نے سوشل میڈیا پر جاری کیے گئے پیغام میں وزیراعظم پر طنزیہ وار کرتے ہوئے کہا کہ آپ نے ارشد ندیم کو موقع دیا؟، نہیں جناب! انہوں نے ساری جدوجہد اپنی مدد آپ کے تحت کی ہے، آپ نے تو ارشد ندیم کو ٹریننگ کے لیے جِم تک کی سہولیات فراہم نہیں کیں‘۔
کرن ملک نے وزیراعظم کے مشیر رانا مشہود سے مخاطب ہوتے ہوئے کہا کہ آپ ارشد ندیم کو عزت دیں کیونکہ انہوں نے عالمی سطح پر پوری پاکستانی قوم کا سر فخر سے بُلند کیا ہے۔ اُنہوں نے مزید کہا کہ آپ اور آپ کے وزیراعظم صاحب تو صرف اپنی جیب بھرنے میں مصروف ہیں۔
