اسلام آباد (شوبز ویب ڈیسک) پاکستانی شوبز انڈسٹری کے نامور اداکار حسن احمد نے کہا ہے کہ سنیتا کو پہلی بار ایک سفر کے دوران جہاز میں دیکھا تھا، انہیں دیکھا تو دیکھتا ہی رہ گیا، سنیتا سے اسی وقت محبت ہو گئی تھی۔
پاکستانی شوبز انڈسٹری کی نامور جوڑی سنیتا مارشل اور حسن احمد 2008 میں شادی کے بندھن میں بندھے تھے، دو مختلف مذاہب سے تعلق ہونے کی وجہ سے اکثر انہیں تنقید کا بھی سامنا کرنا پڑا، خیال رہے حسن احمد مسلمان جبکہ سنیتا مارشل کا تعلق کرسچن کمیونٹی سے ہے۔
سنیتا مارشل اور حسن احمد نجی ٹی شو میں شریک ہوئے جہاں انہوں نے اپنی شادی کے حوالے سے بات کی، اداکارہ سنیتا مارشل نے بتایا کہ جب ہماری پہلی بار فون پر بات ہوئی تو اس وقت حسن احمد ایڈورٹائزنگ ایجنسی میں کام کرتے تھے اور ابتدائی دو سے تین ماہ تک انہوں نے صرف موبائل فون پر باتیں کیں اور اس وقت سمارٹ موبائل نہیں تھے۔
ان کا کہنا تھا کہ شروع میں کئی ماہ تک ہم نے صرف ایک دوسرے کی آواز سنی تھی اور فون پر باتیں کرتے تھے اور تین ماہ بعد ایک دوسرے سے ملے، اگرچہ ہم دونوں کا شادی کرنے کا منصوبہ تھا لیکن اتنی جلدی شادی کرنے کا ارادہ نہیں تھا اور جب ہماری شادی ہوگئی تو کافی عرصے تک حسن کہتے رہے کہ ان کی شادی جلد ہوگئی ہے۔
حسن احمد نے بتایا کہ انہیں ان کے بڑے بھائی نے جنوری 2008 میں کہا کہ وہ کینیڈا شفٹ ہو رہے ہیں، اس لیے اپریل تک وہ شادی کرلیں، میں اس وقت شادی کے لیے تیار نہیں تھا لیکن پھر بھی شادی کر لی۔
اداکار کا کہنا تھا کہ جب ہماری شادی ہوئی تو سنیتا اپنے کیریئر کے عروج پر تھیں، جب کہ میرا کیریئر شروع ہی نہیں ہوا تھا اور مالی حالات بھی اچھے نہیں تھے۔
