کراچی میں خاتون نے بہادری کا مظاہرہ کرتے ہوئے ڈاکو کو پکڑ لیا

واردات کے دوران خاتون نے ڈاکو کا پستول پکڑ لیا،خاتون کے بیٹے نے ڈاکو کو لات ماری جس کے بعد راہ چلتے شہریوں ڈاکو کو پکڑ لیا، خوب درگت بھی بنائی

کراچی(کرئم ڈیسک) کراچی میں خاتون نے بہادری کا مظاہرہ کرتے ہوئے ڈاکو کو پکڑ لیا۔میڈیا رپورٹس کے مطابق مشتعل شہریوں نے ڈاکو کو تشدد کا نشانہ بنانے کے بعد ایف بی انڈسٹریل ایریا پولیس کے حوالے کردیا۔ایف بی انڈسٹریل ایریا راشد منہاس روڈ پر باہمت خاتون نے ڈکیتی کی کوشش ناکام بنا دی۔ایک عینی شاہد کا کہنا ہے کہ موٹر سائیکل سوار دو مسلح ملزمان فیملی سے ڈکیتی کی کوشش کر رہے تھے، واردات کے دوران خاتون نے ڈاکو کا پستول پکڑ لیا تھا۔
خاتون کے بیٹے نے ڈاکو کو لات ماری جس کے بعد مجھ سمیت راہ چلتے شہریوں نے ایک ڈاکو کو پکڑ لیا تھا، شہریوں کی جانب سے ڈاکو کو پکڑنے کے بعد اس کی بھرپور درگت بناٸی گٸی، عینی شاہد نے مزید بتایا کہ پکڑے گئے ڈاکو کے قبضے سے اسلحہ برآمد کیا گیا۔
دوسرا ڈاکو موقع پر سے فرار ہوگیا۔دوسری جانب شہر قائد میں سپر مارکیٹ تھانے کے علاقے لیاقت آباد میں پیش آنے والے واقعے کے بعد پولیس نے مقدمہ درج کرلیا، جس کے مطابق لیاقت آباد کمرشل ایریا مکان نمبر 3/4 کے رہائشیوں سے کار سوار ملزمان 2 ہزار 200 سعودی ریال ، 10 اماراتی درہم، 5 آسٹریلین ڈالر اور 5 ہزار روپے لوٹ کر فرار ہوگئے۔

مدعی ارشد حسین کے مطابق بدھ اور جمعرات کی درمیانی شب تقریباً 2 بج کر 45 منٹ پر اس کے ساس او سسر عمرے کی ادائیگی کے بعد جدہ سے واپس آئے تھے اور جیسے ہی گھر پہنچے،سفید رنگ کی ٹویوٹا کرولا کار جس پر BDN-260 نمبر کی رجسٹریشن پلیٹ لگی ہوئی تھی،میں سوار 3 افراد جو پولیس وردی میں ملبوس تھے آئے اور انہوں نے مجھ سے میرے ساس سسر سے متعلق دریافت کیا۔
پولیس وردی میں ملبوس ڈاکوؤں کو میں نے بتایا کہ وہ عمرہ کی ادائیگی کر کے آئے ہیں، جس پر انہوں نے سامان چیک کرنا شروع کیا۔اِسی دوران ہینڈ کیری کی تلاشی لینے کے لیے مجھ سے بیگ لیا،جس میں ایک سفید پلاسٹک کی تھیلی میں مذکورہ رقم تھی۔ ڈاکو نے اچانک وہ تھیلی لی،بیگ میری طرف اچھالا اور خود کار میں بیٹھ کر فرار ہوگئے۔پولیس نے مدعی کا بیان قلم بند کرنے کے بعد پولیس وردی پہنے 3 نامعلوم ملزمان کے خلاف مقدمہ الزام نمبر 227/2023 بجرم دفعہ 382/34 کے تحت درج کرلیا۔