خاتون کو گن پوائنٹ پر بھی مبینہ زیادتی کا نشانہ بنایا گیا، پولیس نے متاثرہ خاتون کی مدعیت میں مقدمہ درج کر لیا
اسلام آباد (کرائم ڈیسک) اسلام آباد کے مشہور سیاحتی مقام ٹریل 3 پر خاتون کو مبینہ زیادتی کا نشانہ بنا دیا گیا، خاتون کو گن پوائنٹ پر بھی مبینہ زیادتی کا نشانہ بنایا گیا، پولیس نے متاثرہ خاتون کی مدعیت میں مقدمہ درج کر لیا۔ تفصیلات کے مطابق وفاقی دارالحکومت اسلام آباد کے مشہور سیاحتی مقام پر انتہائی افسوسناک اور دلخراش واقعہ پیش آنے کا انکشاف ہوا ہے۔
میڈیا رپورٹس کے مطابق مارگلہ ہلز کے ٹریل 3 پر خاتون سے مبینہ زیادتی کا انکشاف ہوا ہے۔
پولیس کے مطابق خاتون سے مبینہ زیادتی کا واقعہ 13جولائی کو پیش آیا،واقعے کا مقدمہ درج کرلیا گیا ہے۔ ایف آئی آر کے مطابق شیخوپورہ کی رہائشی خاتون کو ایک شخص نے نوکری کا جھانسہ دے کر راولپنڈی بلایا۔ ملزم خاتون کو انٹرویو کے بہانے ٹریل 3 پر لے گیا جہاں خاتون کو گن پوائنٹ پر مبینہ زیادتی کا نشانہ بنا ڈالا۔
ملزم نے خاتون کو واقعے کا بتانے پر جان سے مارنے کی دھمکی دی۔ اس واقعے کے حوالے سے محکمہ وائلڈ لائف کا بھی اہم بیان سامنے آیا ہے۔ بتایا گیا ہے کہ ٹریل 3 پر خاتون سے مبینہ زیادتی کے کیس کی تحقیقات مقامی پولیس کر رہی ہیں، وائلڈ لائف محکمہ مقامی پولیس کو تفتیش میں مکمل معاونت فراہم کر رہا ہے۔
