محکمہ سپیشلائزڈ ہیلتھ کیئر نے سرکاری ہسپتالوں میں جدید سہولتوں اور انتظامات کے حوالے سے مراسلہ جاری کردیا
لاہور ( نیوز ڈیسک ) پنجاب کے محکمہ صحت نے صوبے کے سرکاری ہسپتالوں میں موجود ادویات کی ڈیجیٹل فہرستیں جاری کرنے کا حکم دے دیا۔ تفصیلات کے مطابق محکمہ سپیشلائزڈ ہیلتھ کیئر پنجاب نے سرکاری ہسپتالوں میں غریب مریضوں کے لیے بہترین طبی سہولتیں فراہم کرنے کے لیے اہم اقدامات کا آغاز کیا ہے، وزیراعلیٰ پنجاب مریم ںواز کے ہدایات کے تحت تمام سرکاری ہسپتالوں میں موجود ادویات کی فہرستیں آویزاں کرنے اور آئی سی یو میں سرجیکل و ڈسپوزیبل سامان کی فراہمی کو ممکن بنایا جائے گا۔
بتایا گیا ہے کہ محکمہ سپیشلائزڈ ہیلتھ کیئر نے سرکاری ہسپتالوں میں جدید سہولتوں اور انتظامات کے حوالے سے مراسلہ جاری کیا ہے جس میں کئی اہم نکات شامل ہیں، جس کے تحت ہر سرکاری ہسپتال میں ادویات کی ڈیجیٹل اور مینئول فہرستیں آویزاں کی جائیں گی تاکہ مریضوں کو دوا کی دستیابی کے حوالے سے معلومات فراہم کی جا سکیں، اسی طرح ہسپتالوں میں آئی سی یو اور دیگر طبی یونٹس میں سرجیکل و ڈسپوزیبل سامان کی فراہمی کو یقینی بنایا جائے گا، جن میں سرنجیز، کینولا، ڈرپ سیٹ، سرجیکل ٹیپ، نیڈلز، سرجیکل سوچرز، کاٹن رول، کاٹن بینڈیج، نیسوگیسٹرک ٹیوب اور اینڈتراچیل ٹیوب شامل ہیں۔
بتایا جارہا ہے کہ صوبے کے سرکاری ہسپتالوں میں مریضوں کی شکایات کے لیے خصوصی کاؤنٹرز بھی قائم کیے جائیں گے تاکہ مریضوں کو کسی بھی قسم کی پریشانی کا سامنا نہ ہو، ہسپتالوں میں عملے کے ڈیوٹی روسٹر آویزاں کرنے کی ہدایت کی گئی ہے تاکہ مریضوں کو کسی بھی وقت ضروری طبی عملے تک رسائی حاصل ہو سکے، اس کے ساتھ ہی ہسپتالوں میں صفائی ستھرائی کے معیار کو بہتر بنانے کے لیے سخت ہدایات جاری کی گئی ہیں تاکہ مریضوں کے لیے ایک صاف ستھرا اور آرام دہ ماحول فراہم کیا جا سکے، یہ اقدامات سرکاری ہسپتالوں کی کارکردگی کو بہتر بنانے اور مریضوں کو معیاری طبی خدمات فراہم کرنے کیلئے اٹھائے گئے ہیں۔
