تھانہ لکسیاں پولیس نے منشیات فروشوں کے اڈے پر چھاپہ مارا ملزمان نے پولیس پر اندھادھند فائرنگ کر دی، فائرنگ سے کانسٹیبل عمران وینس اور کانسٹیبل رانا شفیق شہید جبکہ سب انسپکٹر ممتاز اور ایلیٹ کانسٹیبل نعمان شدید زخمی ہوگئے
سرگودھا ( کرائم ڈیسک ) سرگودھا میں منشیات فروشوں کی فائرنگ سے 2 پولیس اہلکار شہید اور 2 شدید زخمی ہوگئے،واقعہ کی اطلاع پر پولیس کی بھاری نفری بھی موقع پر پہنچ گئی اور ملزموں کے خلاف کارروائی شروع کردی،بتایا گیا ہے کہ تھانہ لکسیاں پولیس سرگودھا کے علاقے میںواقع پیش آیا جہاں پولیس نے منشیات فروشوں کی گرفتاری کیلئے ریڈ کیا۔
منشیات فروشوں کے اڈے پر چھاپہ مارا تو ملزمان نے پولیس پر اندھا دھند فائرنگ کردی۔منشیات فروشوں کی فائرنگ سے پولیس کے 2 کانسٹیبل عمران وینس اور کانسٹیبل رانا شفیق شہید جبکہ سب انسپکٹر ممتاز اور ایلیٹ کانسٹیبل نعمان شدید زخمی ہوگئے۔ملزمان اندھیرے کا فائدہ اٹھاتے ہوئے موقع سے فرار ہو گئے جن کی گرفتاری کیلئے پولیس کی جانب سے مختلف مقامات پر چھاپے مارے جا رہے ہیں۔
واقع کی اطلاع ملتے ہی پولیس کی بھاری نفری موقع پر پہنچی جنہوں نے شہداءکے جسد خاکی اور زخمیوں کو ڈسٹرکٹ ہیڈ کوارٹرہسپتال منتقل کردیا گیا۔آر پی او سرگودھا محمد شہزاد آصف خان اور ڈی پی او محمد صہیب اشرف پولیس کی بھاری نفری کے ہمراہ موقع پر پہنچ گئے اور معاملے کی خودنگرانی کی۔آئی جی پنجاب ڈاکٹر عثمان انور نے واقعے کا سختی سے نوٹس لیتے ہوئے آر پی او سرگودھا سے فوری رپورٹ طلب کر لی۔
انہوں نے اس عزم کا اظہار بھی کیا ہے کہ شہداءکی قربانی رائیگاں نہیں جائے گی اور ملزمان کو جلد گرفتار کر کے قانون کے کٹہرے میں لایا جائے گا۔آئی جی پنجاب پولیس نے ڈی پی او سرگودھا کو ملزمان کی جلد گرفتاری کا حکم بھی دیا۔ انہوں نے فرض کی راہ میں شہادت پانے والے پولیس اہلکاروں کی لازوال قربانی کو خراج عقیدت پیش کیا۔بعدازاں منشیات فروشوں کی فائرنگ کا نشانہ بننے والے پولیس شہداءکی نماز جنازہ پولیس لائنز میں ادا کردی گئی۔ نماز جنازہ میں آرپی او شہزاد آصف خان، کمشنر ملک جہانزیب اعوان سمیت دیگر نے بھی شرکت کی۔ جبکہ سرگودھا پولیس کے چاق و چوبند دستے نے سلامی پیش کی۔نماز جنازہ کے بعد پولیس کے دونوں شہداء کے جسد خاکی ان کے آبائی گاوں روانہ کردئیے گئے۔
