ارمغان کا کہنا ہے کہ لاش چھپانے کا مشورہ شیراز نے ہی دیا تھا، شیراز جھوٹ بول رہا ہے اور اس کا بیان معنی نہیں رکھتا، مصطفی عامر کی والدہ وجیہہ عامر کی گفتگو
کراچی ( کرائم ڈیسک ) کراچی میں دوست کے ہاتھوں قتل ہونے والے مصطفی عامر کی والدہ وجیہہ عامر نے انکشاف کیا ہے کہ مصطفی عامر کی لاش بلوچستان میں ٹھکانے لگانے کا آئیڈیا شیراز کا ہی تھا، ارمغان کاکہنا ہے کہ لاش چھپانے کا مشورہ شیراز نے ہی دیا تھا، شیراز جھوٹ بول رہا ہے اور اس کا بیان معنی نہیں رکھتا،نجی نیوز چینل سے گفتگو کرتے ہوئے مصطفی عامر کی والدہ نے کہا کہ مقتول کی والدہ نے بتایا کہ مصطفیٰ کیس میں ارمغان کے حوالے سے پہلے دن سے مجھے ڈرایا جا رہا ہے۔
ملزم شیراز کے بیان کی کوئی حیثیت نہیں، اس نے اپنے آپ کو بچانے کیلئے بیان دیا، شیراز نے من گھڑت کہانی بنا کر سنائی لیکن وہ وعدہ معاف گواہ نہیں بنے گا۔ شیراز گواہ نہیں بلکہ بیٹے کے قتل کے جرم میں برابر کا شریک ہے۔
مصطفی عامر کی والدہ نے یہ بھی کہا کہ پولیس کی جانب سے ہونے والی تفتیش میں اب تک مطمئن ہوں۔گفتگو کے دوران مصطفی عامر کی والدہ کا مزید کہنا تھا کہ پولیس کے مطابق ملزمان نے مصطفی کا موبائل فون توڑکر پھینک دیا تھا۔
میں نے یہ کبھی نہیں کہا ارمغان نے مجھے تاوان کیلئے کال کی۔ جنوری میں ارمغان سے میری بحث ہوئی اس کے بعد تاوان کی کال آئی۔ تاوان مانگنے والوں کے پاس ایسا کوئی ثبوت نہیں تھا کہ مصطفی ان کے پاس ہے۔ایک سوال کے جواب میں انہوں نے کہا کہ مصطفی عامر ارمغان کے گھر منشیات فروخت کرنے نہیں گیا تھا، ارمغان نے اپنے والد کو واقعے کا بتایا تو اس نے کہا کہ تم فرار ہوجاﺅ۔
ارمغان کے والد کامران قریشی کو بھی تو شامل تفتیش کیا جائے۔ارمغان سے متعلق مقتول مصطفی عامر کی وادلہ وجیہہ عامر کا کہنا تھا کہ ارمغان ایک جملہ بولنے کے بعد گھنٹوں کیلئے سن ہو جاتا ہے۔ ارمغان کوہینڈل کرنا آسان نہیں اس لئے پولیس ریمانڈ حاصل کررہی ہے۔دوسری جانب کراچی کی عدالت نے منشیات کیس میں مرحوم مصطفی عامرکا مقدمہ ختم کردیا عدالت نے ایس ایچ او کے بیان کے بعد مصطفی عامر کے خلاف مقدمہ ختم کیا۔
بتایاگیا ہے کہ اینٹی نارکوٹکس کورٹ میں مصطفی عامر کا مقدمہ ختم کردیاگیا ، منشیات کیس میں مصطفیٰ کا نام عامر عرف تیمور ولد عامر شجاع درج تھا۔ایس ایچ او اے این ایف کورنگی نے عدالت کو بیان دیتے ہوئے بتایا کہ منشیات کیس میںمصطفی عامرکا نام عامرعرف تیمور ولد عامر شجاع درج تھا۔ ملزم عامرعرف تیمور کا انتقال ہو چکا ہے۔ ایس ایچ او نے مقتول مصطفی کا ڈیتھ سرٹیفکیٹ اور دیگردستاویزات پیش کیں۔بعدازاں عدالت نے ایس ایچ او کے بیان کے بعد مقدمہ ختم کردیا۔
