راولپنڈی ( کرائم ڈیسک ) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایات پر ٹاسک فورس نے ریجن بھر میں تجاوزات اور غیر قانونی ہاؤسنگ سکیموں کے خاتمے کے لیے اپنی کوششیں تیز کر دی ہیں۔آر ڈی اے انفورسمنٹ اسکواڈ نے گلشن آباد ہاؤسنگ سکیم میں لے آؤٹ پلان کی خلاف ورزیوں، غیر قانونی تعمیرات اور تجاوزات کے خلاف ایک بڑا آپریشن کیا۔
اس آپریشن میں بغیر منظور شدہ کام کرنے والی غیر قانونی ہاؤسنگ سکیم قائم مینشن کو بھی نشانہ بنایا گیا، جس میں متعلقہ قوانین کی خلاف ورزی کرنے والے عناصر کے خلاف سخت کارروائی کی گئی۔ آپریشن کے نتیجے میں دونوں ہاؤسنگ سکیموں اور راولپنڈی اڈیالہ روڈ پر قائم غیر قانونی تعمیرات کو مسمار کیا گیا اور تجاوزات کا خاتمہ کیا گیا ہے ۔
کریک ڈاؤن جس کی نگرانی ڈی جی آر ڈی اے کنزہ مرتضیٰ نے کی، آر ڈی اے کے عزم کو اجاگر کرتا ہے جو عوامی مفادات کے تحفظ اور زمین کے غیر قانونی طریقوں کو روکنے کے لیے بھرپور اقدامات کر رہا ہے۔
ڈی جی آر ڈی اے نے واضح کیا کہ تجاوزات اور غیر منظور شدہ ہاؤسنگ سکیموں کے خلاف جاری آپریشن کو پوری قوت کے ساتھ جاری رکھا جائے گا تاکہ شہریوں کو دھوکہ دہی اور استحصال سے بچایا جا سکے۔ انہوں نے مزید کہا کہ آر ڈی اے زمینوں پر غیر قانونی قبضوں کے حوالے سے عوام الناس کی شکایات کو سنجیدگی سے لے رہا ہے اور زمینوں پر غیر قانونی قبضوں میں ملوث پائے جانے والوں کے خلاف سخت قانونی کارروائی شروع کی جائے گی۔
شفافیت اور عوامی تحفظ کے اپنے عزم کے مطابق آرڈی اے مسلسل پریس ریلیز جاری کرتا ہے تاکہ عوام کو اپنے اقدامات سے آگاہ کیا جا سکے۔ شہریوں سے اپیل ہے کہ وہ غیر قانونی ہاؤسنگ سکیموں میں سرمایہ کاری سے گریز کریں۔ منظور شدہ ہاؤسنگ سکیموں کے بارے میں مزید معلومات کے لیے، عام لوگوں کو آرڈی اے کی ویب سائٹ www.rda.gop.pk پر چیک کرنے کی ترغیب دی جاتی ہے۔
آر ڈی اے آپریشن ٹیم میں ڈائریکٹر لینڈ غضنفر علی اعوان، اسسٹنٹ ڈائریکٹر پلاننگ آر ڈی اے علی رضا، بلڈنگ سرویئر عامر محمود ملک، اور دیگر آر ڈی اے سکیم و بلڈنگ انسپکٹرز کے ساتھ تھانہ صدر بیرونی راولپنڈی کے اہلکار شامل تھے۔ آرڈی اے غیر قانونی ہاؤسنگ طریقوں کا خاتمہ کرنے اور تمام شہریوں کے لیے ایک منصفانہ اور محفوظ ماحول فراہم کرنے کے اپنے مشن میں پرعزم ہے۔
