کراچی: ( کرائم ڈیسک ) چوری کا سامان خریدنے والے کباڑیوں کو گرفتار کرنے پر مشتعل افراد نے تھانے پر دھاوا بول دیا۔ تفصیلات کے مطابق پولیس کی جانب سے موٹر سائیکل کے سپیئر پارٹس برآمد ہونے پر 2 کباڑیوں کو گرفتار کر کے تھانے لایا گیا تو ان کے درجنوں مشتعل ساتھیوں نے گلستان جوہر پولیس سٹیشن پر حملہ کر دیا، گرفتار کباڑیوں کے ساتھیوں نے تھانے پر پتھراؤ بھی کیا جس کے نتیجے میں 2 پولیس اہلکار شدید زخمی ہو گئے۔
واقعے کے بعد پولیس کی جانب سے مزید نفری طلب کر لی گئی، اہلکاروں نے مشتعل ہجوم کو منتشر کر کے تھانے پر حملے میں ملوث 8 افراد کو حراست میں لے لیا، مقدمہ درج کر کے مزید قانونی کارروائی شروع کر دی گئی۔
دوسری جانب پولیس نے واقعے کے حوالے سے بتایا ہے کہ چوری کا سامان خریدنے والے کباڑیوں کے خلاف کارروائی کی گئی تھی، دو کباڑیوں کو تھانے اٹھا کر لائے تھے جن کے قبضے سے موٹر سائیکل کے سپیئر پارٹس ملے۔
