ملزم کی کسی خاتون کے ساتھ دوستی ہوئی تو وہ پیسوں میں ہیر پھیر کرنے لگا، ملزم کے والد کو پتا چلا تو انہوں نے 8 ماہ قبل اس کو کام سے الگ کر دیا اور گھر سے نکال دیا تھا؛ پولیس
کراچی ( کرائم ڈیسک ) صوبہ سندھ کے دارالحکومت کراچی میں بیٹے نے سابق سکیورٹی گارڈ کو 3 لاکھ روپے دے کر اپنے سگے باپ کو قتل کرادیا، پولیس نے ملزم کو گرفتار کرلیا۔ تفصیلات کے مطابق کراچی کے علاقے کورنگی میں سابق سکیورٹی گارڈ کو 3 لاکھ کی سپاری دے کر والد کو قتل کروانے بیٹے اور ساتھی ملزمان کو گرفتار کرلیا گیا، پولیس حکام نے بتایا کہ افسوس ناک واقعہ زمان ٹاون تھانے کی حدود میں 18 فروری 2025ء کو پیش آیا تھا، جب سید محمد متین خان نامی شخص کو گھر کے قریب فائرنگ کر کے قتل کر دیا گیا تھا جس کے بعد کارروائی کرتے ہوئے پولیس نے واقعے میں ملوث مقتول کے بیٹے دانش، اس کی بیوی طوبیٰ، دانش کی دوست ایمن اور 2 ملزمان محمد ظریف اور شہید اللہ کو گرفتار کرکے ان کے قبضے سے نائن ایم ایم پستول اور تھانہ کورنگی صنعتی ایریا کی حدود سے چھینی گئی موٹر سائیکل برآمد کرلی، تاہم مرکزی ملزم سیال خان کی گرفتاری کے لیے کوشش کی جا رہی ہے۔
بتایا گیا ہے کہ مقتول متین کیبل کا کام کرتا تھا اور ملزم دانش اپنے والد کے ساتھ کام کرتا تھا، ملزم دانش کی ایمن نامی خاتون کے ساتھ دوستی ہوگئی، جس کے بعد وہ پیسوں میں ہیر پھیر کرنے لگا، ملزم کے والد کو پتا چلا تو انہوں نے 8 ماہ قبل ملزم دانش کو کام سے الگ کر دیا اور گھر سے نکال دیا، جس کے بعد ملزم اپنے سسرال میں جا کر رہنے لگ گیا، سسرال والوں نے اس کے والد کو سمجھایا تو وہ واپس گھر آگیا۔
بتایا جارہا ہے کہ گھر واپسی کے بعد دانش نے کلفٹن میں ملازمت شروع کردی جہاں اس کی ملاقات سیال خان نامی سکیورٹی گارڈ سے ہوئی، سیال خان نے نوکری چھوڑ دی تاہم ملزم دانش اس سے رابطے میں رہا اور اس کے ساتھ مل کر وارداتیں بھی کرنے لگا، 2 ماہ قبل ملزم کا اپنے باپ سے پھر جھگڑا ہوا جس پر اس کے باپ نے اسے برا بھلا کہا تو ملزم نے سیال خان سے باپ کو قتل کرنے کی بات کی اور 3 لاکھ روپے میں سپاری دے کر اپنے والد کو قتل کروادیا۔
