کراچی: ( کرائم ڈیسک ) کراچی کے پوش علاقے کلفٹن میں سنیپ چیکنگ کے دوران مبینہ پولیس مقابلہ ہوا جس کے نتیجے میں 4 ملزمان ہلاک ہوگئے۔ پولیس کے مطابق کراچی کے علاقے کلفٹن گندا نالہ سٹاپ پر سنیپ چیکنگ کے دوران مسلح ملزمان اور پولیس کے درمیان مبینہ طور پر فائرنگ کا تبادلہ ہوا جس کے نتیجے میں 4 ملزمان مارے گئے۔
پولیس حکام کا بتانا ہے کہ مقابلے میں ہلاک ملزمان سے اسلحہ اور 2 موٹرسائیکلیں بھی برآمد ہوئیں۔ ڈی آئی جی ساؤتھ اسد رضا نے اس حوالے سے بتایا کہ ملزمان میں عبدالستار، سری چند، راج کمار اور نواب احمد شامل ہیں، ہلاک ملزمان کا کرمنل ریکارڈ بھی موجود ہے۔
پولیس کے مطابق ملزمان نے 2 ہفتے قبل ڈیفنس فیز 5 میں ڈکیتی مزاحمت پر سکیورٹی گارڈ کوقتل کیا تھا جبکہ ملزمان مقتول سعید سے 5 لاکھ روپے چھین کر فرار ہو گئے تھے۔
