لاس اینجلس: (سپورٹس ویب ڈیسک) کرکٹ 2028ء کے لاس اینجلس اولمپکس کا بھی حصہ بن گئی۔ میڈیا رپورٹس کے مطابق لاس اینجلس اولمپکس میں کرکٹ کے ساتھ فلیگ فٹ بال، بیس بال اور سافٹ بال کو بھی اولمپکس کا حصہ بنایا گیا ہے، لاس اینجلس اولمپکس آرگنائزنگ کمیٹی جلد کھیلوں کی شمولیت کا اعلان کرے گی۔
رپورٹس کے مطابق سکواش کو اولمپکس میں اضافی کھیل کے طور پر شامل کرنے کی تجویز ہے جبکہ کرکٹ مقابلے ٹی 20 فارمیٹ میں ہوں گے، لاس اینجلس اولمپکس میں مردوں اور خواتین دونوں کے کرکٹ مقابلے ہوں گے۔
اس سے پہلے 1900ء میں پیرس میں ہونے والے اولمپکس میں کرکٹ کھیلی جا چکی ہے، جب انگلینڈ اور فرانس نے گولڈ میڈل کے لیے ایک ہی میچ کھیلا تھا۔
لاس اینجلس اولمپکس میں مردوں اور خواتین کا ٹی 20 ٹورنامنٹ ہو گا جو ایشیا اور برصغیر میں ممکنہ طور پر منافع بخش تجارتی مارکیٹ کھول دے گا۔
ہندوستان میں موجودہ اولمپک نشریاتی حقوق انفرادی کھیلوں کے لیے فروخت کیے جاتے ہیں اور پیرس 2024ء کے لیے صرف 15اعشاریہ 6 ملین پاؤنڈ کی قیمت بتائی جاتی ہے۔
ماہرین کے مطابق اگر کرکٹ کو لاس اینجلس گیمز میں شامل کیا جائے تو یہ رقم 150 ملین پاؤنڈ تک بڑھ سکتی ہے۔
اس کے ساتھ فلیگ فٹ بال، بیس بال اور سافٹ بال بھی 2028ء کے لاس اینجلس اولمپکس میں شمولیت کے لیے تیار ہیں جس کی انٹرنیشنل اولمپک کمیٹی کی جانب سے تصدیق ہونا باقی ہے۔
