راولپنڈی (نیوز ڈیسک) بورڈ آف انٹر میڈیٹ اینڈ سیکنڈری ایجوکیشن راولپندی کے زیر اہتمام امتحان میٹرک سیکنڈ اینول 2023 کے سلسلہ میں چیئرمین تعلیمی بورڈ راولپنڈی محمد عدنان خان نے مختلف امتحانی مراکز کے دورے کیے، دورے کے دوران انہوں نے امتحانی عملے کی حاضری کو چیک کیا اور ہدایات جاری کرتے ہوئے کہا حکومت پنجاب کی جانب سے جاری کردہ ایس او پیز پر سختی سے عملدرآمد کروایا جائے، اس سلسلہ میں کسی قسم کی کوئی کوتاہی برداشت نہیں کی جائے گی، اگر کوئی ایس او پیز کی خلاف ورزی کا مرتکب پایا گیا تو اس کے خلاف تادیبی کارروائی کے ساتھ ساتھ ایف آئی آر کا اندراج بھی کرایا جائے گا، انہوں نے کہا کہ سیکرٹری ہائر ایجوکیشن پنجاب جاوید اختر محمود میٹرک کے امتحان میں سخت حکمت عملی سے بوٹی مافیا کے خاتمے کے لئے پر عزم ہیں، ان کی ہدایت کے مطابق بوٹی مافیا کے خاتمہ، صاف و شفاف امتحانی نظام کے لئے اچھی شہرت کے حامل اساتذہ و دیگر افسران کو مانیٹرنگ کے لئے تعینات کیا گیا ہے ، کنٹرولر امتحانات پروفیسر ساجد محمود فاروقی نے گورنمنٹ گریجویٹ کالج اصغر مال، راولپنڈی اور گورنمنٹ گرلز ہائر سیکنڈری سکول، باغ سرداراں کا دورہ کیا-
انہوں نے امتحانی عملے سے گفتگو کرتے ہوئے کہا کہ امتحان میٹرک کے بہترین و شفاف انعقاد سے لائق و ذہین طلبا و طالبات کی حوصلہ افزائی ہو گی اور تعلیمی بورڈ راولپنڈی کی نیک نامی میں بھی اضافہ ہو گا، انہوں نے کہا کہ امتحانی عملہ اپنے فرائض محنت اور لگن سے سر انجام دے، اگر ان پر کوئی اثرانداز ہونے کی کوشش کرے تو وہ اس کی اطلاع فوراً براہ راست مجھے یا مرکزی کنٹرول روم کو دے تا کہ ایسے عناصر کے خلاف فوری طور پر کارروائی عمل میں لاتے ہوئے انہیں نشان عبرت بنایا جا سکے، انہوں نے کہا بورڈ انسپکشن کمیٹی، موبائل انسپکٹر، چیئرمین سکواڈ اور ضلع انتظامیہ تمام امتحانی مراکز کو مانیٹر کر رہی ہیں، ان کی رپورٹس کی روشنی میں ہم انتظامات کو مزید مؤثر اور جامع بنائیں گے۔
