دبئی : (سپورٹس ویب ڈیسک ) قومی کرکٹ ٹیم کے سابق کپتان شعیب ملک کی اہلیہ اور بھارتی سابق ٹینس سٹار ثانیہ مرزا نے اپنے سوشل میڈیا اکاؤنٹ پر ایک نئی معنی خیز پوسٹ شیئر کی ہے۔
ثانیہ مرزا ان دنوں اپنے اہل خانہ کے ساتھ وقت گزار رہی ہیں، فوٹو اینڈ ویڈیو شیئرنگ پلیٹ فارم انسٹاگرام سٹوری میں انہوں نے لکھا کہ ” خوش قسمت وہ ہے جو اپنے پاس موجود چیز کی قدر کرے، اس وقت جب اس کے پاس وہ چیز موجود ہو” ۔
خیال رہے کہ گزشتہ برس کے اختتام سے سابق بھارتی ٹینس سٹار ثانیہ مرزا اور قومی کرکٹ ٹیم کے سابق کپتان شعیب ملک کی طلاق کے حوالے سے خبریں زیر گردش ہیں۔
تاہم دونوں میں سے کسی نے بھی ان خبروں کی تردید یا تصدیق تاحال نہیں کی ہے ، کچھ عرصہ قبل شعیب ملک نے ان گردشی خبروں کو اس وقت ہوا دی جب انہوں نے اپنے سوشل میڈیا اکاؤنٹ پر اپنا بائیو (تعارف) تبدیل کر دیا۔
دوسری جانب سوشل میڈیا پر یہ قیاس آرائیاں بھی کی جارہی ہیں کہ شعیب اور ثانیہ نے انسٹاگرام سے ایک دوسرے کو فالو کرنا بھی ترک کردیا ہے لیکن ان قیاس آرائیوں میں اب تک کوئی صداقت نہیں ہے اور دونوں ایک دوسرے کو فالو کر رہے ہیں۔
واضح رہے کہ ثانیہ مرزا اور شعیب ملک کی شادی 2010 میں ہوئی تھی، شادی کے 8 برس بعد 2018 میں ان کے یہاں بیٹے کی پیدائش ہوئی، جس کا نام انہوں نے اذہان مرزا ملک رکھا۔
