عشنا سہیل کو پاکستان کی 16 سال نمائندگی اور پاکستان کیلئے سب سے زیادہ سنگلز اور ڈبلز مقابلے جیتنے پر ایوارڈ ملا
اسلام آباد (سپورٹس ڈیسک) پاکستان ٹینس اسٹار عشنا سہیل بلی جین کنگ کپ کمٹمنٹ ایوارڈ جیتنے والی پاکستان کی پہلی خاتون کھلاڑی بن گئیں۔پاکستان ویمن ٹینس ٹیم نے ملائیشیا میں ہونے و الے بلی جین کنگ کپ میں شرکت کی اور اس موقع پر پاکستان ٹینس اسٹار عشنا سہیل بلی جین کنگ کپ کمٹمنٹ ایوارڈ حاصل کرنے میں کامیاب ہوئیں اور انہیں کوالالمپور میں آئی ٹی ایف نے کمٹمنٹ ایوارڈ سے نوازا۔
عشنا سہیل کو 16 سال پاکستان کی نمائندگی کرنے اور اپنے ملک کیلئے سب سے زیادہ سنگلز اور ڈبلز مقابلے جیتنے پر بلی جین کنگ کپ کمٹمنٹ ایوارڈ ملا، ایوارڈ کے موقع پر عشنا سہیل کے والدین بھی تقریب میں موجود تھے۔عشنا سہیل کے مطابق یہ میرے لیے بڑے اعزاز کی بات ہے اور میں یہ ایوارڈ ملنے پر بہت پرجوش ہوں کیونکہ یہ ایوارڈ حاصل کرنے والی میں پاکستان کی پہلی خاتون کھلاڑی ہوں، بین الاقوامی سطح پر مجھے سراہا گیا ہے اور میں پاکستان کے لیے مزید اعزازات حاصل کرنا چاہتی ہوں۔
