دونوں پائلٹ معمولی زخمی ہوئے جنہیں فوری طبی امداد فراہم کی گئی،ابتدائی اطلاعات کے مطابق حادثے میں ابھی تک کوئی جانی نقصان نہیں ہوا ہے، واقعے کی اطلاع ملتے ہی مقامی انتظامیہ، ریسکیو ٹیمیں اور سیکیورٹی فورسز موقع پر پہنچ گئیں اور علاقے کو گھیرے میں لے کر امدادی کارروائیاں شروع کر دیں
وہاڑی ( نیوز ڈیسک ) پنجاب کے علاقے وہاڑی میں پاک فضائیہ کا چھوٹا تربیتی طیارہ گرکر تباہ ہوگیا، حادثے کے وقت طیارے میں 2 پائلٹ سوار تھے جو معمولی زخمی ہوئے تاہم دونوں نے بروقت ایجیکٹ ہو کر اپنی جان بچا لی، دونوں پائلٹ معمولی زخمی ہوئے جنہیں فوری طبی امداد فراہم کی جا رہی ہے۔ تربیتی طیارہ فنی خرابی کے باعث گرکرتباہ ہوا۔
ابتدائی اطلاعات کے مطابق حادثے میں ابھی تک کوئی جانی نقصان نہیں ہوا ہے۔ واقعے کی اطلاع ملتے ہی مقامی انتظامیہ، ریسکیو ٹیمیں اور سیکیورٹی فورسز موقع پر پہنچ گئیں اور علاقے کو گھیرے میں لے کر امدادی کارروائیاں شروع کر دیں۔ بتایا گیا ہے کہ وہاڑی کے علاقے رتہ ٹبہ کے قریب چھوٹا طیارہ گر کر تباہ ہو گیا، میڈیا رپورٹس کے مطابق عینی شاہدین کا کہنا ہے کہ لڈن روڈ پر انوار آباد کے قریب چھوٹا طیارہ گر کر تباہ ہوا۔
طیارہ نجی آئل کمپنی کے ڈپو کے قریب کھیتوں میں گرا۔خوش قسمتی سے کوئی بڑا سانحہ رونما نہ ہوا۔رپورٹ کے مطابق عینی شاہدین کامزید کہنا ہے کہ دھماکے کی آوازدور دور تک سنائی دی گئی جبکہ طیارے گرنے کے بعد اس میں آگ لگ گئی جس کے شعلے اور دھواں آسمان تک بلند ہو رہا ہے۔طیارے کے گرنے کی زوردار آواز سن کر اہلِ علاقہ کی بڑی تعداد موقع پر پہنچ گئی۔
پاک فوج کے ترجمان نے واقعے کی تصدیق کرتے ہوئے بتایا کہ دونوں پائلٹ محفوظ ہیں اور ابتدائی معلومات کے مطابق حادثے کی وجہ فنی خرابی ہے۔ واقعے کی مکمل وجوہات جاننے کیلئے اعلیٰ سطحی تحقیقات کا آغاز کر دیا گیا ہے۔حادثے کے بعد علاقے میں خوف و ہراس پھیل گیا، تاہم کسی شہری یا املاک کو نقصان نہیں پہنچا۔پولیس حکام کاکہنا ہے دونوں پائلٹ پیرا شوٹ کے ذریعے طیارے سے بحفاظت اتر گئے تھے۔پولیس کے مطابق طیارے کے گرنے کی وجوہات اب تک سامنے نہیں آسکی ہیں۔
