ایسی طالبات جن کا سکول گھر سے ڈیڑھ کلومیٹر یا اس سے زیادہ فاصلے پر ہے وہ اس سہولت سے مستفید ہوں گی
پشاور ( نیوز ڈیسک ) خیبرپختونخواہ حکومت نے مڈل سکول کی طالبات کیلئے مفت ٹرانسپورٹ کا اعلان کردیا۔ تفصیلات کے مطابق پاکستان تحریک انصاف کی خیبر پختونخواہ حکومت کی جانب سے مڈل سکول کی طالبات کے لیے مفت ٹرانسپورٹ فراہم کرنے کا اعلان کیا گیا ہے، ابتدائی مرحلے میں ٹرانسپورٹ کی سہولت 10 پسماندہ اضلاع کی طالبات کو فراہم کی جائے گی، اس حوالے سے صوبائی حکومت نے 10 اضلاع کے متعلقہ ایجوکیشن افسران کو مراسلہ ارسال کردیا۔
بتایا گیا ہے کہ پہلے مرحلے میں جن اضلاع میں یہ سہولت شروع کی جائے گی ان میں اپر و لوئر کوہستان، کولئی پالس، تورغر، لکی مروت، ڈی آئی خان، ہنگو، کوہاٹ، بنوں اور چارسدہ شامل ہیں، فیصلے کا اطلاق آئندہ تعلیمی سال کے آغاز سے ہوگا، حکومتی اقدام سے طالبات کو درپیش سفری مسائل کم ہوں گے، وہ طالبات جن کا سکول گھر سے ڈیڑھ کلومیٹر یا زیادہ فاصلے پر ہے وہ اس سہولت سے مستفید ہوں گی۔
علاوہ ازیں خیبرپختونخواہ حکومت کی جانب سے میٹرک کے امتحانات کے لیے پرائیویٹ سکولوں کی جانب سے مقرر کردہ فیس سے زائد فیس وصول کرنے والوں کے خلاف سخت کارروائی کا فیصلہ کیا گیا ہے، یہ فیصلہ کمشنر پشاور ڈویژن ریاض خان محسود کی زیر صدارت میٹرک کے امتحان میں نقل کی روک تھام کے حوالے سے منعقدہ اجلاس کے دوران کیا گیا، اجلاس کے دوران انکشاف کیا گیا کہ میٹرک کے امتحان کےلیے بورڈ کی جانب سے 2 ہزار 600 روپے فیس مقرر کی گئی ہے تاہم بیشتر پرائیویٹ سکولوں کی جانب سے مقررہ شرح سے زائد فیس طلباء و طالبات سے وصول کی گئی ہے۔
بتایا جارہا ہے کہ زائد وصولی کے معاملے پر کمشنر پشاور ڈویژن ریاض خان محسود نے بورڈ چیئرمین کو ان اسکولوں کی فہرست ڈپٹی کمشنرز کو فراہم کرنے کی ہدایات کرتے ہوئے ڈپٹی کمشنرز کو پرائیویٹ اسکولز ریگولیٹری اتھارٹی کے ہمراہ زائد فیس وصول کرنے والے سکول مالکان کے خلاف سخت کارروائی کرنے اور طلباء و طالبات سے وصول کی گئی زائد فیس واپس کرنے کے احکامات جاری کرتے ہوئے رپورٹ طلب کرلی۔
