بالائی پنجاب، اسلام آباد اور خیبرپختونخواہ کے مختلف مقامات پر شدید ژالہ باری ہوسکتی ہے؛ محکمہ موسمیات
اسلام آباد ( نیوز ڈیسک ) محکمہ موسمیات نے ملک میں عید الفطر سے قبل بارشوں کے نئے سلسلے کا امکان ظاہر کردیا۔ محکمہ موسمیات کے مطابق 25 سے 27 مارچ کے دوران بالائی اور وسطی علاقوں میں بارش کا امکان ہے، اس دوران پہاڑوں پر ژالہ باری اور برفبافی بھی متوقع ہے، بونیر، دیر، مالاکنڈ، صوابی، چارسدہ، ایبٹ آباد اور پشاور میں مارچ کی 25 سے 27 تاریخ کے دوران بارش ہوسکتی ہے، اسی دوران کرک، لکی مروت، وزیرستان اور ڈی آئی خان میں بھی بارش ہونے کی توقع ہے، اسی عرصہ میں ژالہ باری اور پہاڑوں پر برفباری بھی ہونے کا امکان ہے۔
محکمہ موسمیات کا کہنا ہے کہ 25 سے 27 مارچ کے دوران اسلام آباد، خطہ پوٹھوہار، مری، گلیات میں بارش اور برفباری متوقع ہے، وسطی پنجاب میں بھی مختلف شہروں میں اسی دوران بارشوں کا امکان ہے، بالائی پنجاب، اسلام آباد اور خیبرپختونخواہ کے مختلف مقامات پر شدید ژالہ باری ہوسکتی ہے، آندھی ژالہ باری سے پنجاب اور خیبرپختونخواہ میں فصلوں کو نقصان پہنچنے کا خدشہ ہے جب کہ سندھ میں 25 اور 26 مارچ کے دوران گرد آلود ہوائیں چل سکتی ہیں، کوئٹہ، زیارت، ژوب، موسیٰ خیل، چمن اور مستونگ سمیت مختلف شہروں میں بارش کی توقع ہے، آندھی کے باعث کھمبوں اور سولر پینلز کو نقصان کا خطرہ ہے، بالائی علاقوں میں لینڈ سلائیڈنگ کا بھی خدشہ ہے۔
بتایا گیا ہے کہ گزشتہ 24 گھنٹوں کے دوران ملک کے بیشتر علاقوں میں مو سم خشک جب کہ میدانی علاقوں میں گرم رہا، اتوار کوریکارڈکئے گئے کم سےکم درجہ حرارت لہہ میں منفی 06، استور میں منفی 01،زیارت اورا سکردو میں 01 ڈگری سینٹی گریڈ ریکارڈ کیا گیا۔
