’ہم سنی سنائی باتوں پر بہت جلد یقین کر لیتے ہیں، یہ ہمارے رشتوں کو خراب کر دیتی ہیں‘ : قومی کرکٹر
اسلام آباد ( سپورٹس ڈیسک ) پاکستان کرکٹ ٹیم کے سابق کپتان شعیب ملک کا کہنا ہے کہ کچھ زخم ایسے ہوتے ہیں جو زندگی بھر نہیں بھرتے، زندگی میں کئی غلطیاں کی ہیں، جن سے ہمیشہ کچھ نہ کچھ سبق سیکھا ہے۔
حال ہی میں 43 سالہ میں شعیب ملک نے ایک پروگرام میں بطور مہمان شرکت کی، جہاں انہوں نے اپنی ذاتی زندگی، کیریئر اور خاندان سے متعلق گفتگو کی۔
انہوں نے دورانِ گفتگو مختلف سوالوں کے کھل کر جوابات دیے اور اپنے خیالات کا اظہار کیا۔
ایک سوال کا جواب دیتے ہوئے انہوں نے بتایا کہ دل پر لگنے والے کچھ زخم ایسے ہوتے ہیں جو پوری عمر نہیں بھرتے، دل کو خوش رکھنا چاہئے، زندگی میں کبھی بھی سب کچھ نہیں مل سکتا، کبھی بھی آپ 100 فیصد صحیح نہیں ہو سکتے، زندگی نشیب و فراز کا نام ہے آپ کو مستقل مزاجی سے کام کرنا چاہئے تاکہ زندگی میں پیش آنے والی مشکلات کا سامنا کیا جا سکے۔
قومی ٹیم کے سابق کپتان کا کہنا ہے کہ انسان کو غصے اور جذبات پر قابو رکھنا چاہئے، جذبات میں آکر کوئی فیصلہ نہیں کرنا چاہئے لیکن ہم انسان ہیں ہم اکثر جذباتی فیصلے لیتے ہیں، میں نے بھی اپنی زندگی میں چھوٹے بڑے جذباتی فیصلے لئے لیکن ان سے سبق بھی سیکھا ہے۔
انہوں نے کہا کہ انسان کو اپنے تجربات سے سیکھنا چاہئے اور اگر مستقبل میں وہ اسی قسم کی صورتِ حال سے دوبارہ گزرے تو جذبات کے بجائے اپنے تجربے کی روشنی میں فیصلہ لینا چاہئے کیونکہ ایک ہی غلطی بار بار نہیں ہونی چاہئے۔
