حکومت نے ڈیلی ویجز ملازمین کو نوکریوں سے برطرف کرنے کا عمل شروع کرتے ہوئے لیٹرز جاری کر دیئے
ایبٹ آباد ( نیوز ڈیسک ) وفاقی حکومت کی جانب سے نوکری سے فارغ کیے جانے پر یوٹیلیٹی سٹور کے ڈیلی ویجز ملازم نے خودکشی کرلی۔ میڈیا رپورٹس کے مطابق وفاقی حکومت نے یوٹیلیٹی سٹورز کارپوریشن کے ڈیلی ویجز ملازمین کو نوکریوں سے برطرف کرنے کا عمل شروع کرتے ہوئے لیٹرز جاری کر دیئے ہیں، لیٹرز میں یومیہ اجرت پر کام کرنے والے ملازمین کو ملازمت سے فوری برطرف کیے جانے سے متعلق آگاہ کیا گیا، ایسا ہی لیٹر ملنے کے بعد نوکری سے فارغ ہونے کی اطلاع ملنے پر یوٹیلیٹی سٹور کے ڈیلی ویجز ملازم نے خودکشی کرلی، جنید قریشی 13 سال سے یوٹیلیٹی سٹور پر کام کرتا تھا۔
واضح رہے کہ حکومت نے ملک بھر میں یوٹیلیٹی اسٹورز کارپوریشن (یو ایس سی) کے 2500 سے 2600 ڈیلی ویجز ملازمین کو نکالنے کا فیصلہ کیا، یو ایس سی بورڈ آف ڈائریکٹرز نے پہلے ہی ان ملازمین کو نکالنے کی منظوری دے دی تھی اور اب متعلقہ زونز کو اس پر عملدرآمد کے احکامات جاری کر دیئے گئے ہیں، یہ اقدام حکومتی ’’رائٹ سائزنگ پالیسی‘‘کے تحت کیا جا رہا ہے جس کا مقصد اداروں میں غیر مستقل ملازمین کی تعداد کم کرنا ہے، اس پالیسی کے تحت ملک بھر کے یوٹیلیٹی سٹورز پر کام کرنے والے پچیس سے چھبیس سو ڈیلی ویجز ملازمین کو برطرف کیا جائے گا۔
دوسری طرف ڈیلی ویجز ملازمین کی برطرفی کے خلاف یوٹیلیٹی سٹورز یونین نے ملک گیر احتجاج کا اعلان کیا ہے، اسلام آباد ہیڈ آفس بلیو ایریا کے سامنے احتجاج ہوگا، ملک بھر کے پریس کلبز کے سامنے بھی مظاہرے کیے جائیں گے، وفاقی دارالحکومت میں دھرنے کا امکان ہے، مطالبات کی منظوری تک احتجاج جاری رہے گا، اس حوالے سے یونین عہدیداران کا کہنا ہے کہ برطرفی کا فیصلہ واپس نہ لیا گیا تو آئندہ کا لائحہ عمل دیا جائے گا، احتجاج شدت اختیار کرسکتا ہے اور ملک بھر میں سٹورز بند کرنے کی وارننگ بھی دے دی گئی۔
