پاکستان نے گروپ میچز میں انڈیا ، مکاؤ اور چین کو شکست دے کر ناقابل شکست رہتے ہوئے ناک آوٹ راؤنڈ میں جگہ بنائی تھی
ہانگ کانگ ( سپورٹس ڈیسک ) پاکستان نے جاپان کو 22 ویں ایشین جونیئر اسکواش ٹیم چیمپئن شپ کے کوارٹر فائنل میں 1-2 سے شکست دے کر سیمی فائنل میں رسائی حاصل کرلی۔ کوارٹر فائنل میں انس علی شاہ نے پاکستان کے لیے پہلا میچ جیتا، انہوں نے رینشی ماکینو کو 53 منٹ کے سنسنی خیز مقابلے میں 4-11، 6-11، 11-7 اور 8-11 سے ہرایا۔
تاہم، سخی اللہ خان ترین کو شو تاکاشی کے ہاتھوں 57 منٹ تک جاری رہنے والے سخت مقابلے میں 9-11، 6-11، 11-2، 11-7 اور 8-11 سے شکست کا سامنا کرنا پڑا۔
فیصلہ کن میچ میں عبداللہ نواز نے شاندار کارکردگی کا مظاہرہ کرتے ہوئے شنساکو کاریازونو کو صرف 30 منٹ میں 7-11، 5-11 اور 10-12 سے شکست دے کر پاکستان کی فتح یقینی بنائی۔
پاکستان کا سیمی فائنل میں مقابلہ کوریا سے ہوگا۔
اس سے قبل پاکستان نے گروپ میچز میں انڈیا ، مکاؤ اور چین کو شکست دے کر ناقابل شکست رہتے ہوئے ناک آوٹ راؤنڈ میں جگہ بنائی تھی۔
یاد رہے کہ 22 ویں ایشین جونیئر اسکواش ٹیم چیمپئن شپ اس وقت ہانگ کانگ، چین میں 12 سے 16 فروری 2025ء تک ہو رہی ہے۔ ایشین اسکواش فیڈریشن کے زیر اہتمام اس باوقار ایونٹ میں ایشیا بھر کی ٹاپ جونیئر ٹیمیں لڑکوں اور لڑکیوں دونوں کیٹیگریز میں حصہ لے رہی ہیں۔
لڑکوں کے مقابلے میں ہانگ کانگ چین، بھارت، انڈونیشیا، ایران، جاپان، کوریا، کویت، ملائیشیا، پاکستان، سنگاپور، سری لنکا اور تھائی لینڈ کی ٹیمیں شامل ہیں۔
دریں اثناء لڑکیوں کے زمرے میں ہانگ کانگ چین، بھارت، جاپان، کوریا، ملائیشیا، سنگاپور اور سری لنکا کی ٹیمیں شامل ہیں۔
