ڈی چوک میں دور حاضر کے جنرل ڈائیر نے قوم کو اپنا غلام گردانتے ہوئے نہتے اور پر امن شہریوں پر بلااشتعال گولیاں چلوائیں، ہم اس واقعے کو کبھی بھی بھولنے نہیں دیں گے؛ جیل میں وکلاء سے گفتگو
راولپنڈی ( نیوز ڈیسک ) پاکستان تحریک انصاف کے بانی چیئرمین عمران خان کا کہنا ہے کہ ساری عمر بھی جیل میں گزارنے کیلئے تیار ہوں لیکن وقت کے یزید کے آگے کبھی نہیں جھکوں گا۔ جیل میں 500 دن مکمل ہونے پر اپنے ورکرز اور وکلاء سے اڈیالہ جیل عدالت میں گفتگو کرتے ہوئے انہوں نے کہا کہ سب سے پہلے تو آپ نے گھبرانا نہیں ہے، اللہ الحق ہے وہ حق سچ کا خدا ہے اور صبر کرنے والوں کے ساتھ ہے، ہم سب اس ملک کی حقیقی آزادی کے لیے قربانی دے رہے ہیں، آپ نے صبر کرنا ہے اور میرے ساتھ مل کر ظلم کا مقابلہ کرنا ہے، میں ساری عمر بھی جیل میں گزارنے کے لئے تیار ہوں لیکن وقت کے یزید کے آگے کبھی نہیں جھکوں گا۔
سابق وزیراعظم کا کہنا ہے کہ ڈی چوک میں دور حاضر کے جنرل ڈائیر نے قوم کو اپنا غلام گردانتے ہوئے نہتے اور پر امن شہریوں پر بلااشتعال گولیاں چلوائیں، ہم اس واقعے کو کبھی بھی بھولنے نہیں دیں گے اور اپنے ورکرز اور شہداء کو انصاف دلائیں گے، مجھے ورکرز اور وکلا نے بتایا ہے ابھی تک سامنے آنے والے 12 شہدا وہ ہیں جنہیں 26 نومبر کو مغرب سے پہلے شہید کیا گیا اور باقی لوگوں کو رات کو علاقے کی بجلی بند کروا کر گولیاں ماری گئی ہیں، ان کو کدھر غائب کیا گیا ہے؟۔
عمران خان کہتے ہیں کہ اب بھی درجنوں افراد مسنگ ہیں، لاپتا افراد کو تلاش کرنا اور تمام ڈیٹا پبلک کرنا حکومت کی ذمہ داری ہے، میڈیا سمیت ہزاروں لوگوں نے اندھا دھند فائرنگ اور بربریت اپنی آنکھوں سے دیکھی اور اس کے بعد ہسپتالوں کا ریکارڈ غائب کرنے اور شہداء کی لاشیں ورثاء کو فراہم کرنے سے انکار کی بھی میڈیا رپورٹس موجود ہیں، ہمارا مطالبہ ہے کہ جلد از جلد نو مئی کے فالس فلیگ آپریشن اور 26 نومبر کے اسلام آباد قتل عام کی شفاف تحقیقات اور ذمہ داران کے تعین کے لیے آزادانہ جوڈیشل کمیشن تشکیل دیا جائے جس میں سینئر ترین سپریم کورٹ ججز شامل ہوں، قوم تیار رہے میں جلد اگلے لائحہ عمل کا اعلان کروں گا-
