بابر اعظم نے گزشتہ سال ون ڈے ورلڈ کپ کے بعد قومی ٹیم کی کپتانی چھوڑ دی تھی
لاہور (نیوز ڈیسک ) پاکستان کے اسٹار بلے باز بابر اعظم نے جمعرات کو لاہور میں قومی ٹیم کی کپتانی میں تبدیلی کی افواہوں کے درمیان پاکستان کرکٹ بورڈ (پی سی بی) کے چیئرمین محسن نقوی سے ملاقات کی۔ ذرائع کے مطابق نقوی اور اعظم نے ایک بار پھر قومی ٹیم کے کپتان کے طور پر ذمہ داری سنبھالنے کے امکان کے بارے میں تفصیلی بات چیت کی۔
واضح رہے کہ پی سی بی نے گزشتہ سال ٹی ٹوئنٹی کرکٹ میں شاہین آفریدی اور شان مسعود کو ٹیسٹ میں کپتان بنایا تھا۔ یہ پیشرفت اس وقت سامنے آئی جب پاکستان کرکٹ بورڈ (پی سی بی) نے کہا کہ وہ 8 اپریل کو ختم ہونے والے فٹنس کیمپ کے بعد ٹی ٹوئنٹی ٹیم کے کپتان کے طور پر شاہین کے مستقبل کا فیصلہ کرے گا۔ 24 مارچ کو سلیکشن کمیٹی کے اعلان کے بعد پریس سے گفتگو کرتے ہوئے پی سی بی کے چیئرمین محسن نقوی نے بطور کپتان شاہین کے مستقبل پر زیادہ بات نہیں کی۔
محسن نقوی نے کہا کہ میں بھی نہیں جانتا کہ کپتان کون ہوگا۔ “شاہین برقرار رہیں گے یا کوئی نیا کپتان آئے گا اس کا تعین فٹنس کیمپ کے بعد کیا جائے گا۔ انہوں نے مزید کہا کہ “بہت سے تکنیکی عوامل ہیں جن پر ہم غور کریں گے جن کی تفصیلات میں میں نہیں جانا چاہتا۔ ہم ایک طویل مدتی حل چاہتے ہیں چاہے وہ شاہین ہو یا کوئی نیا آدمی۔ اور پھر ہم صرف اس آدمی کے ساتھ رہنا چاہتے ہیں بجائے اس کے کہ کپتان کو صرف اس لیے تبدیل کرنا کہ آپ میچ ہار گئے۔
” بابر اعظم نے ورلڈ کپ کی ذلت آمیز مہم کے بعد نومبر میں اہم پوزیشن پر اپنے برسوں پر محیط دور کو ختم کرتے ہوئے تمام فارمیٹس سے قومی ٹیم کے کپتان کی حیثیت سے استعفیٰ دے دیا۔ بابر اعظم کو اس سے قبل 2019ء میں وائٹ بال کا کپتان اور 2020ء میں ٹیسٹ کپتان مقرر کیا گیا تھا لیکن گرین شرٹس نے ان کی قیادت میں کوئی آئی سی سی یا ایشیا کپ ٹائٹل نہیں جیتا ہے۔
