راولپنڈی (نیوز ڈیسک) بورڈ آف انٹرمیڈیٹ اینڈ سیکنڈری ایجوکیشن راولپنڈی کے آمدہ امتحان میٹرک فرسٹ اینول 2024 کی مؤثر و جامع نگرانی اور فول پروف انتظامات کو یقینی بنانے کے لئے ایک اہم اجلاس چیئرمین آفس کے کمیٹی روم میں منعقد کیا گیا، امتحان میٹرک فرسٹ اینول یکم مارچ سے شروع ہو گا ۔اجلاس میں چیئرمین تعلیمی بورڈ راولپنڈی محمد عدنان خان ، کنٹرولر امتحانات پروفیسر ساجد محمود فاروقی، سیکرٹری بورڈ پروفیسر آصف حسین اور بورڈ افسران نے شرکت کی، کنٹرولر امتحانات پروفیسر ساجد محمود فاروقی نے امتحان میٹرک فرسٹ اینول 2024 کے انتظامات سے متعلق بریف کیا۔
سیکرٹری بورڈ پروفیسر آصف حسین نے امتحان میٹرک فرسٹ اینول کے سلسلہ میں مین پاور ٹرانسپورٹیشن اور ایڈمنسٹریشن سے متعلقہ امور اور امتحانی انتظامات کو کامیابی سے منعقد کرانے میں بھرپور تعاون کی یقین دہانی کرائی ۔
اجلاس سے خطاب کرتے ہوئے چیئرمین تعلیمی بورڈ راولپنڈی نے کہا کہ امتحان میٹرک فرسٹ اینول 2024 کے انتظامات کا جائزہ لینے کے لئے یہ میٹنگ بلائی گئی ہے، بورڈ کے تمام افسران و اہلکاران اپنی تمام تر توانائیاں امتحان میٹرک کو کامیاب بنانے میں صرف کریں، انتظامات میں کسی قسم کی کوئی کوتاہی برداشت نہیں کی جائے گی ، طلباء اور طالبات کو بہترین امتحانی سہولیات فراہم کرنا ہماری اولین ترجیح ہے ، امتحانی مراکز کی نگرانی اور سکیورٹی کے لئے مؤثر اور جامع پالیسی مرتب کی گئی ہے، ہر ضلع کے ڈپٹی کمشنر اور ڈسٹرکٹ پولیس آفیسر سے رابطے میں ہیں، مزید برآں ڈیوٹی انجام دینے والے عملے کی فہرستیں سپیشل برانچ کو ارسال کر دی گئی ہیں تا کہ ڈیوٹی دینے والے امتحانی عملے کو مانیٹر کیا جاسکے ۔
انہوں نے امید ظاہر کی کہ تمام بورڈ افسران و اہلکاران اور امتحانی عملہ اپنی ڈیوٹی قومی فریضہ سمجھ کر ادا کریں گے۔
