ایشیا کپ فائنل میں پہنچنے کا آخری موقع، پاک سری لنکا میچ کے دوران بارش ہو گی یا موسم خشک رہے گا؟

14 ستمبر کو میچ کے وینیو کولمبو کے موسم کی پیشن گوئی کر دی گئی، جمعرات کے ٹاکرے کی فاتح ٹیم ٹورنامنٹ کا فائنل کھیلے گی

کولمبو (سپورٹس ڈیسک) ایشیا کپ فائنل میں پہنچنے کا آخری موقع، پاک سری لنکا میچ کے دوران بارش ہو گی یا موسم خشک رہے گا؟ 14 ستمبر کو میچ کے وینیو کولمبو کے موسم کی پیشن گوئی کر دی گئی، جمعرات کے ٹاکرے کی فاتح ٹیم ٹورنامنٹ کا فائنل کھیلے گی۔ تفصیلات کے مطابق منگل کے روز بھارت نے کولمبو میں کھیلے گئے سپر 4 مرحلے کے چوتھے میچ میں سری لنکا کو 41 رنز سے شکست دے کر ایشیاء کپ فائنل میں جگہ بنا لی۔
سری لنکا کیخلاف بھارت کی اس فتح سے پاکستان کیلئے بھی فائنل تک رسائی کے امکانات بڑھ گئے ہیں، تاہم لنکن لائنز کی شکست کے باوجود قومی ٹیم کی ایک بڑی مشکل آسان نہ ہو سکی۔ سپر 4 مرحلے کے 4 میچز مکمل ہو جانے کے بعد سری لنکا اب بھی بہت نیٹ رن ریٹ کے باعث پوائنٹس ٹیبل پر پاکستان سے آگے ہے۔
پاکستان اور سری لنکا دونوں ٹیموں کے پوائنٹس 2،2 ہیں، تاہم سری لنکا نیٹ رن ریٹ منفی عشاریہ 20 ہے، جو کہ پاکستان کے نیٹ رن ریٹ منفی 1.892 سے بہتر ہے۔

اسی لیے ٹورنامنٹ کے فائنل تک رسائی کیلئے پاکستان کو 14 ستمبر کو شیڈول میچ میں سری لنکا کیخلاف لازمی فتح حاصل کرنی ہو گی۔ اگر بارش کی وجہ سے 14 ستمبر کے میچ کا انعقاد ممکن نہ ہو سکا تو پھر اس صورت میں پاکستان اور سری لنکا کو 1،1 پوائنٹ مل جائے گا، جبکہ بہتر نیٹ رن ریٹ کے باعث سری لنکا فائنل میں پہنچ جائے گا۔ 14 ستمبر کو بارش کے باعث میچ نہ ہونے کی صورت میں پاکستان کیلئے فائنل تک رسائی کے امکانات ختم ہو جائیں گے۔
تاہم بی بی سی ویدر رپورٹ کے مطابق جمعرات 14 ستمبر کو پاک سری لنکا میچ والے دن کولمبو میں بارش ہونے کے امکانات کم ہیں۔ 14 ستمبر کو کولمبو میں بارش کے زیادہ سے زیادہ 30 فیصد امکانات ہیں، یعنی جمعرات کو پاکستان اور سری لنکا کے میچ کے انعقاد کے قوی امکانات ہیں۔ واضح رہے کہ اب ایشیاء کپ ٹورنامنٹ میں صرف 3 میچز باقی رہ گئے ہیں۔ 14 ستمبر کو پاکستان اور سری لنکا مدمقابل آئیں گے، جبکہ 15 ستمبر کو بھارت اور بنگلہ دیش کی ٹیمیں آمنے سامنے آئیں گے۔
15 ستمبر کو سپر 4 مرحلے کے اختتام کے بعد 17 ستمبر کو ٹورنامنٹ کا فائنل کھیلا جائے گا۔ یہاں یہ واضح رہے کہ ٹورنامنٹ کے بقیہ تمام میچز بھی بارش سے متاثر ہونے کے امکانات ہیں۔ جبکہ 14 ستمبر کا پاکستان اور سری لنکا کا میچ ٹورنامنٹ کے سیمی فائنل کی حیثیت اختیار کر گیا ہے۔