سگریٹ نوشی سے منع کرنے پر پی آئی اے کی پروز میں مسافر کا ائیرہوسٹس پر تشدد

قومی ائیرلائین کی بین الاقوامی پرواز میں جھگڑا کرنے والے مسافر کیخلاف فرانس پہنچنے پر سخت قانونی ایکشن لے لیا گیا

پیرس ( نیوز ڈیسک ) سگریٹ نوشی سے منع کرنے پر پی آئی اے کی پروز میں مسافر کا ائیرہوسٹس پر تشدد، قومی ائیرلائین کی بین الاقوامی پرواز میں جھگڑا کرنے والے مسافر کیخلاف فرانس پہنچنے پر سخت قانونی ایکشن لے لیا گیا۔ تفصیلات کے مطابق پاکستان انٹرنیشنل ایئرلائن کی پیرس پرواز پر تمباکو نوشی سے منع کرنے پر فضائی میزبانوں پر حملہ کرنے والے مسافر کو کپتان کی شکایت پر گرفتار کرلیا گیا، مذکورہ مسافر کے خلاف فرانس کے قوانین کے مطابق قانونی کارروائی ہو گی ۔
پی آئی اے کے ترجمان کی طرف سے جاری بیان کے مطابق گزشتہ روز پی ائی اے کی اسلام آباد سے پیرس کی پرواز پی کے 749 پر ایک مسافر نے خلاف قانون تمباکو نوشی کرنے کی کوشش کی۔ خاتون فضائی عملے کی جانب سے منع کرنے کے باوجود مسافر نے تمباکو نوشی بند نہ کی اور بدتمیزی کی ، عملے اور کپتان کے اسرار کرنے پر مسافر نے خاتون فضائی میزبان کا بازو پکڑ کر مروڑا اور کمر پر مکہ مارا جس سے وہ زخمی ہوگئیں ۔
مسافر نے فلائیٹ سٹورٹ اور کپتان پر بھی حملہ کیا مگر انہوں نے مسافر سے سگریٹ چھین لی۔ کپتان نے ضابطے کے مطابق فرانسیسی حکام کو دوران پرواز آگاہ کیا اور جہاز کی پیرس آمد پر مسافر کو پولیس نے گرفتار کر لیا۔ فضائی میزبانوں کے بیانات ریکارڈ کرکے اور ان کا میڈیکل کروا کے پولیس رپورٹ درج کر لی گئی ہے۔ پی آئی اے کے ترجمان نے کہا کہ فرانسیسی قوانین اس معاملے میں بہت سخت ہیں اور امید ہے کہ مسافر سے کسی قسم کی رعایت نہیں برتی جائے گی۔ مسافر کو پی آئی اے پر بلیک لسٹ کردیا گیا ہے اور اب وہ دوبارہ قومی ائیرلائن پر سفر نہیں کرسکیں گے ۔ ترجمان پی آئی اے کے مطابق پی ائی اے کے عملے نے اپنے فرائض منصبی کی ادائیگی میں پروفیشنلزم سے کام لیا اور اب قانون اپنا کام کرے گا۔