حکومت کا ایک ہی مقصد ہے پی ٹی آئی اور فوج کی لڑائی کروا کر ہماری جماعت ختم کروائیں‘ 9 مئی واقعات میں ہماری بے گناہی سی سی ٹی وی میں چھپی ہے۔ قائد پی ٹی آئی کی جیل میں صحافیوں سے گفتگو
راولپنڈی ( نیوز ڈیسک ) پاکستان تحریک انصاف کے قائد عمران خان کا کہنا ہے کہ مسلم لیگ ن اور پیپلزپارٹی جوتے کے سہارے لٹک رہی ہیں جس پر 9 مئی کا ٹیگ لگا ہے، حکومت سے ہم کیا مذاکرات کریں، پی پی پی اور ن لیگ دونوں فارم 47 والے ہیں، محمود خان اچکزئی کو ہم نے مذاکرات کا مینڈیٹ دیا تھا، دوسری طرف سے کوئی نام سامنے آتا تو ہم بات کرتے، ہم نے فوج پر الزامات نہیں تنقید کی تھی، گھر میں کوئی بگڑا ہوا بچہ ہو تو اس پر تنقید کی جاتی ہے، فوج پر تنقید اس وجہ سے کی تھی کیوں کہ تنقید جمہوریت کا حسن ہے، فوج اپنا نمائندہ مقرر کرے ہم مذاکرات کرنے کیلئے تیار ہیں، مذاکرات کیلئے پہلا مطالبہ ہے چوری کیا گیا مینڈیٹ واپس کیا جائے، مذاکرات کیلئے دوسرا مطالبہ ہے گرفتار کارکنان کی رہائی اور مقدمات کا خاتمہ ہے، تیسرا مرحلہ ملک بچانے کا ہے جو صاف و شفاف الیکشن کے بغیر ممکن نہیں۔
اڈیالہ جیل میں صحافیوں سے غیر رسمی گفتگو کرتے ہوئے انہوں نے کہا کہ حکومت کا ایک ہی مقصد ہے پی ٹی آئی اور فوج کی لڑائی کروا کر ہماری جماعت ختم کروائیں، 9 مئی واقعات میں ہماری بے گناہی سی سی ٹی وی میں چھپی ہے، اگر 9 مئی میں پی ٹی آئی کا کوئی بندہ ملوث ہے تو اُسے ضرور سزا دیں، 28 سالہ جدوجہد میں کبھی توڑ پھوڑ کی بات نہیں کی، ساری پارٹیاں جلسے کر رہی ہیں لیکن ہمیں جلسہ کرنے کی اجازت نہیں دیتے، ابھی صوابی میں جلسہ کر رہے ہیں اگلا جلسہ اسلام آباد میں کریں گے۔
سابق وزیراعظم کا کہنا ہے کہ ہمیں یہ نہ بتائیں کہ فوج نے کیا غلطی کی ہے، سُپریم کورٹ نے فیصلے میں کہا کہ ذوالفقار علی بھٹو کی سزا غیر قانونی تھی، سزا کے پیچھے جنرل ضیاء الحق کا ہاتھ تھا، سقوط ڈھاکہ کے پیچھے جنرل یحییٰ خان کا ہاتھ تھا، اس وقت ملک میں غیر اعلانیہ مارشل لاء نافذ ہے، ایس آئی ایف سی کیا ہے؟ محسن نقوی کون ہے؟ محسن نقوی انہی کا تو نمائندہ ہے وہ یہاں ان ہی کے ذریعے پہنچا، محسن نقوی سے کبھی بات نہیں کروں گا، اس نے آئی جی پنجاب سے مل کر ہمارے لوگوں پر ظلم کیا، یہ ظل شاہ کی موت کا ذمہ دار ہے، یہ بیرون ملک کہیں نہیں جا سکے گا، باہر ممالک میں تشدد سے نفرت کی جاتی ہے۔
انہوں نے کہا کہ مریم نواز فاشسٹ ہے، وہ باپ کے چوری کے پیسوں پر ایسے پلی ہے جیسے شہزادی ہو، مریم نواز نے آئی جی پنجاب کو اسی لئے رکھا ہوا ہے کہ اس نے پی ٹی آئی پر ظلم کیا ہے، اسی طرح جسٹس عامر فاروق مجھے ٹیریان کیس میں پھنسانا چاہتا تھا، میرے اور اہلیہ کے سارے کیسسز عامر فاروق کیوں سنتا ہے؟ مجھے جوڈیشل کمپلیکس سے اغواء کیا گیا تو عامر فاروق نے اسے درست قرار دیا، میں نے چیف جسٹس اسلام اباد ہائیکورٹ عامر فاروق کے خلاف ریفرنس دائر کیا ہے، چیف جسٹس اسلام آباد ہائیکورٹ عامر فاروق سے گزارش ہے انصاف کے اصولوں کے تحت میرے مقدمات سے الگ ہو جائیں، ہائیکورٹ میں اور بھی ججز ہیں کسی اور کو کیسسز دے دیں۔
عمران خان کہتے ہیں کہ حالات یہ ہیں کہ میرے جیل کے کمرے کی صفائی کرنے والے کا بجلی کا بل 40 ہزار روپے آیا ہے، بجلی کے بلوں اور ٹیکسسز میں ہوشربا اضافہ پر جماعت اسلامی کے موقف کی حمایت کرتا ہوں، ہماری پارٹی اس دھرنے میں بھرپور شرکت کرے گی، پارٹی لیڈر شپ کو کہوں گا آج ہی جماعت اسلامی کے دھرنے میں شمولیت کریں، اسی طرح لاپتہ افراد کی بازیابی کیلئے نکلنے والی بلوچ عوام کی حمایت کرتا ہوں، بلوچستان میں لوگوں کو غائب کرنا ظلم ہے، حکومت ہوش کرے اس سے بلوچ عوام میں بہت زیادہ نفرت پھیل رہی ہے، پہلے ہمیں جبری گمشدگی کے درد کا پتہ نہیں تھا لیکن پنجاب میں سب سے پہلے ہماری پارٹی کے ساتھ جبری گمشدگیاں شروع ہوئیں، اظہر مشوانی کے دونوں بھائی اٹھا لیے اور ابھی تک لاپتہ ہیں، شہباز گل کے بھائی کا پتہ نہیں چل رہا، ہمارے 25 ورکرز اب تک غائب ہیں، آپ لوگوں کو ڈنڈے کے زور پر چپ نہیں کرواسکتے۔
