کراچی(این این آئی) پاکستان اور ڈنمارک کے درمیان سبز توانائی کی منتقلی کا معاہدہ طے پا گیا، سفیر ڈنمارک نے کہا کہ موسمیاتی تبدیلی سے آنے والے کرائسز میں ڈنمارک پاکستان کیساتھ ہر سطح پر کھڑا ہے۔تفصیلات کے مطابق پاکستان اور ڈنمارک میں سبز توانائی گرین ٹیک کی منتقلی کے حوالے سے معاہدہ طے پا گیا، اس موقع پرمقامی ہوٹل میں ڈنمارک کے سفیر جیکب لینولف نے گریم ٹیک انرجی کانفرنس سے خطاب کرتے ہوئے کہا کہ ہماری کوشش ہے پاکستان میں سبزتوانائی کے حوالے سے آگاہی فراہم کی جائے۔،
سفیر ڈنمارک نے کہا کہ موسمیاتی تبدیلی کے نقصانات سے بچانے کیلئے اقدامات کرنا ہوں گے ، پاکستان کے خوبصورت نظاروں کا گواہ ہوں بہت خوبصورت ملک ہے۔انھوں نے کہا کہ موسمیاتی تبدیلی،سیلابی تباہ کاری ،گلیشئرپگھلنا سب نے لوگوں کو خطرے میں ڈالا ہے ، ہمیں اس صورتحال کو خطرے کی گھنٹی کے طور پر لینا چاہئے، اس کرائسز میں ڈنمارک پاکستان کیساتھ ہر سطح پر کھڑا ہے۔
جیکب لینولف نے مطالبہ کیا کہ اقوام متحدہ پاکستان میں موسمیاتی تبدیلی سے نقصان کو پورا کرنے میں مدد کرے۔انہوں نے کہا تھا کہ اپنی مہارت اور تجربے کی بنیاد پر ڈنمارک کی مدد یقینی طور پر پاکستان کے لیے گرین انرجی مکس کی جانب منتقلی اور موسمیاتی تبدیلی کے اہداف اور پائیدار ترقی کے اہداف کے حوالے سے پاکستان کے وعدوں کو پورا کرنے میں فائدہ مند ثابت ہوگی۔
