بیجنگ: (انٹرنیشنل ڈیسک ) چین کے سابق وزیراعظم لی کی چیانگ دل کا دورہ پڑنے سے انتقال کر گئے، ان کی عمر 68 برس تھی۔ چینی میڈیا کے مطابق لی چیانگ رواں سال مارچ میں وزارتِ عظمیٰ کے عہدے سے استعفیٰ دیا تھا۔
وہ چین کی حکمران جماعت کمیونسٹ پارٹی آف چائنا کی 17 ویں، 18 ویں اور 19 ویں سینٹرل کمیٹی کے پولیٹکل بیورو کی سٹینڈنگ کمیٹی کے رکن رہے۔
چینی میڈیا کے مطابق 68 سالہ سابق وزیراعظم شنگھائی شہر میں مقیم تھے ، جمعرات اور جمعہ کی درمیانی رات انہیں دل کا دورہ پڑا، ان کی جان بچانے کی ہرممکن کوشش کی گئی تاہم وہ جانبر نہ ہوسکے۔
نگران وزیراعظم و صدرپاکستان کا اظہارافسوس
پاکستان کے نگران وزیراعظم انوارالحق کاکڑ نے سابق چینی وزیراعظم کے انتقال پرافسوس کا اظہار کیاہے ۔
انوارالحق کاکڑ نے سوشل میڈیا سائٹ (ایکس) پر تعزیتی پیغام میں لکھا کہ لی کی چیانگ پاکستان کے عظیم دوست تھے، 2013میں لی کی چیانگ کے دورہ پاکستان کی بڑی اچھی یادیں ہیں، غم کی گھڑی میں اہل خانہ اور چینی عوام سے اظہا ر ہمدردی کرتے ہیں۔
“Deeply saddened and shocked to learn about the sad demise of former Chinese Premier Li Keqiang. He was a great friend of Pakistan. We fondly remember his visit to Pakistan in 2013. Our thoughts and sympathies are with Late Premier Li, his family and with the Chinese nation at…
— Anwaar ul Haq Kakar (@anwaar_kakar) October 27, 2023
صدر مملکت ڈاکٹر عارف علوی نے چین کے سابق وزیر اعظم لی چیانگ کے انتقال پر اظہارِ افسوس کرتے ہوئے کہا ہے کہ پاکستان آج ایک عظیم دوست سے محروم ہوگیا ۔
انہوں نے کہا کہ لی کی چیانگ پاک چین اقتصادی اور تزویراتی تعلقات کے بڑے حامی تھے، پاکستانی عوام کی جانب سےغم کی اس گھڑی میں تعزیت کا اظہار کرتا ہوں۔
