واقعے کے فوری بعد ایمرجنسی سروسز کے اہلکار بھی سفید پاوڈر کو ٹیسٹ کرنے کے لیے پہنچ گئے ،مزید تحقیقات جاری
واشنگٹن(انٹرنیشنل ڈیسک) امریکی صدر جوبائیڈن کی غیر موجودگی کے دوران وائٹ ہاوس سے ملنے والا سفید پاوڈر منشیات نکلی۔غیرملکی میڈیا کے مطابق وائٹ ہاوس سے گزشتہ اتوار کو ملنے والا سفید پاوڈر منشیات (کوکین)تھی۔رپورٹس کے مطابق سیکرٹ سروس ایجنٹس کو سفید پاوڈر اتوار کو ویسٹ ونگ کے علاقے سے مقامی وقت کے مطابق رات 8:45 پر ملا تھا جہاں عام لوگوں کی رسائی بھی ہوتی ہے۔
غیرملکی میڈیا کے مطابق اس واقعے کے فوری بعد ایمرجنسی سروسز کے اہلکار بھی سفید پاوڈر کو ٹیسٹ کرنے کے لیے پہنچ گئے تھے۔رپورٹس کے مطابق پاوڈر کے ابتدائی ٹیسٹ کے بعد پتا چلا کہ یہ منشیات (کوکین) تھی۔غیرملکی میڈیا کے مطابق اس واقعے کے وقت امریکی صدر جوبائیڈن وائٹ ہاوس میں موجود نہیں تھے۔
امریکی صدر کی سیکیورٹی کی ذمے دار ایجنسی نے اس حوالے سے ایک بیان میں کہا کہ سفید پاوڈرکو مزید جانچ کے لیے بھیجا گیا تھا اور اس کے وائٹ ہاوس میں داخل ہونے کی وجہ اور طریقے کی تحقیقات زیر التوا ہیں۔
غیرملکی میڈیا کے مطابق ویسٹ ونگ وائٹ ہاوس کا وہ حصہ ہے جو صدر کی رہائش گاہ اور ایگزیکٹو مینشن سے منسلک ہے۔ اوول آفس، کیبنٹ روم، پریس روم اور صدر کے عملے کے ارکان کے دفاتر بھی یہیں واقع ہیں۔رپورٹس کے مطابق اس جگہ پر متعدد لوگ آتے جاتے اور کام کرتے ہیں۔
