حکومت کی جانب سے ممکنہ طور پر یکم مئی سے آئندہ 15 دنوں کیلئے پیٹرولیم مصنوعات کی قیمتوں میں کسی بھی قسم کی تبدیلی متوقع نہیں
اسلام آباد ( کامرس ڈیسک ) ملک میں ایک بار پھر پیٹرولیم مصنوعات کی قیمتیں برقرار رہنے کی توقع ہے۔ میڈیا رپورٹس کے مطابق ملک میں پیٹرولیم مصنوعات کی قیمتیں برقرار رہنے کا امکان ہے، حکومت کی جانب سے ممکنہ طور پر یکم مئی سے آئندہ 15 دنوں کیلئے پیٹرولیم مصنوعات کی قیمتوں میں کسی بھی قسم کی تبدیلی متوقع نہیں ہے، صنعتی اور سرکاری تخمینوں میں کہا گیا ہے کہ فی لیٹر پیٹرول کی قیمت میں صرف چند پیسوں کی معمولی سی کمی اور ہائی سپیڈ ڈیزل کی فی لیٹر قیمت میں ایک پیسہ کے اضافے کی توقع ہے، اس لیے قومی امکان یہی ہے کہ آئندہ 15 روز کے لیے ملک میں پیٹرول اور ڈیزل کی موجودہ قیمتوں کو ہی برقرار رکھا جائے گا۔
دوسری طرف پاک بھارت کشیدگی کے پیش نظر پیٹرولیم مصنوعات کی وافر مقدار ذخیرہ کرنے کے احکامات جاری کردیئے گئے، آئل مارکیٹنگ کمپنی ذرائع کا کہنا ہے کہ پاکستان اور بھارت کے درمیان بڑھتی ہوئی کشیدگی کے باعث پیٹرولیم مصنوعات کی وافر مقدار ذخیرہ کرنے کے احکامات جاری کیے گئے ہیں، ان احکامات کے تحت آئل مارکیٹنگ کمپنیوں اور آئل ریفائنری کو ڈیزل اور جیٹ فیول کی زیادہ سے زیادہ دستیابی یقینی بنانے کی ہدایت کی گئی ہے۔
بتایا جارہا ہے کہ ملک میں جیٹ فیول اور ہائی اسپیڈ ڈیزل سمیت دیگر پٹرولیم مصنوعات موجود ہیں، تاہم پی ایس او سمیت دیگر امپورٹ کرنے والی کمپنیوں کو بھی آئل بروقت درآمد کرنے کی ہدایت دی گئی ہیں، ڈی جی آئل نے پی ایس او اور آئل مارکیٹینگ کمپنیوں کو ہدایت جاری کردی ہیں جب کہ ڈی جی آئل کی طرف سے ہدایت ملنے کے بعد ایمرجنسی میں حالات سے نمٹنے کے لیے اقدامات کرلیے گئے۔
