ہیلی کاپٹر دارالحکومت کھٹمنڈو سے سیابروبیسی کی طرف جا رہا تھا. پولیس حکام
کھٹمنڈو( انٹرنیشنل ڈیسک ) نیپال میں ایک ہیلی کاپٹر گر کر تباہ ہو گیا جس میں سوار پائلٹ اور 4 چینی باشندوں سمیت تمام 5 مسافر ہلاک ہوگئے. بین الاقوامی نشریاتی ادارے کے مطابق ایئر ڈائنسٹی ہیلی کاپٹر دارالحکومت کھٹمنڈو سے سیابروبیسی کی طرف جا رہا تھا، جو سیاحوں میں مقبول ٹریکنگ کے بہت سے راستوں کا نقطہ آغاز ہے سول ایوی ایشن اتھارٹی کی ایک پریس ریلیز میں بتایا گیا کہ پرواز کے تقریباً تین منٹ بعد طیارے کا رابطہ منقطع ہو گیا اور ہیلی کاپٹر دارالحکومت کے شمال میں واقع ضلع نواکوٹ میں گر کر تباہ ہو گیا.
پولیس کے ترجمان دان بہادر کارکی نے بتایا کہ اس حادثے میں پائلٹ سمیت تمام 5 افراد ہلاک ہو گئے ہیں نواکوٹ کے ضلع افسر رام کرشنا ادھیکاری نے بتایا کہ جائے حادثہ سے 5 لاشیں نکال لی گئی ہیں. انہوں نے کہا کہ پولیس پہلے ہی جائے وقوعہ پر پہنچ چکی ہے اور ریسکیو آپریشن جاری ہے یاد رہے کہ نیپال کی فضائی صنعت نے حالیہ برسوں میں ترقی کی ہے لیکن یہ ناکافی تربیت اور دیکھ بھال کی وجہ سے ناقص حفاظتی نظام سے دوچار ہے بدھ کو ہونے والا واقعہ کھٹمنڈو میں طیارے کے حادثے کے دو ہفتے بعد پیش آیا ہے جس میں پائلٹ کے علاوہ تمام 18 افراد ہلاک ہو گئے تھے.
