اسلام آباد(این این آئی)ڈپٹی کمشنرعرفان میمن نے کہاہے کہ اسلام آباد میں روٹی کی قیمت16روپے اورنان کی قیمت20روپے ہے۔وفاقی دارالحکومت میں روٹی اور نان کی قیمتوں کے حوالے سے ڈی سی اسلام آباد نے اپنے بیان میں کہاکہ اس وقت اسلام آباد میں روٹی کی قیمت 16روپے نان کی 20روپے ہے، اسلام آباد ہائی کورٹ کے احکامات کے مطابق (آج)ہفتہ کو 12بجے ایسوسی ایشن کو دوبارہ ملیں گے۔عدالتی احکامات کے تحت ایسوسی ایشن کے سامنے 16روپے کے حساب سے روٹی کی منافع کیلکولیشن دوبارہ رکھی جائیں گی۔
ایک رائے ہے کہ پنجاب میں کرائے کم ہیں، اس لیے وہاں قیمت کم لیکن اسلام آباد میں نہیں ہو سکتی،پنجاب کے کئی اضلاع میں قیمتیں 12روپے کہیں 13کہیں 15روپے ہے۔ڈی سی نے کہا اسلام آباد کا بھی 70فیصد سے زائد ایریا تو رورل ہے،فیض آباد سے روات تک رورل ایریا ہے،راولپنڈی میں بینک روڑ اور کنٹونمنٹ ان رورل ایریاز سے بہتر ہے لیکن قیمت وہی ہے۔قیمتوں کا تعین یہ تمام چیزیں دیکھتے ہوئے کیا گیا تھا،عدالتی احکامات کے تحت ملاقات تو ہوگی لیکن قانون کے مطابق ایکشن جاری رہیں گے۔
