کراچی(این این آئی)رمضان المبارک کی آمد سے قبل ہی ناجائز منافع خوروں نے حفظان صحت کے اصولوں کو بالائے طاق رکھتے ہوئے کروڑوں روپے کے مضر صحت چنا درآمدکر لیاہے۔رمضان المبارک کی آمد قریب ہے۔ اس ماہ مبارک میں چنے کا استعمال بڑھ جاتا ہے جس کے باعث متعلقہ کاروباری افراد رمضان کے آغاز سے قبل ہی اس کا اسٹاک کرتے ہیں تاہم اطلاعات ہیں کہ ناجائز مناقع خوروں نے امسال رمضان سے قبل کروڑوں روپ کے مضر صحت چنا درآمد کر لیاہے ۔پروٹیکشن ڈپارٹمنٹ ملازمین کی ملی بھگت سے چنے کے 5 کنٹینرز کلیئر کرا لیے گئے تھے اور معلوم ہوا ہے کہ ان میں سے چار کنٹینرز کو فروخت بھی کیا جا چکا ہے۔
اس حوالے سے ڈی جی پلانٹ پروٹیکشن اللہ دتہ نے بتایاکہ میں چھٹی پر ہوں اور مجھے اس معاملے کے بارے میں مکمل علم نہیں ہے تاہم کلیئرنس میں ملوث تین افسران کو ایف آئی اے نے اپنی تحویل میں لے لیا ہے۔انہوں نے کہا کہ ایف آئی ار کی کاپی مل گئی ہے تحقیقات کے بعد مذکورہ تینوں افسران کے خلاف محکمہ جاتی کارروائی بھی کی جائے گی۔دوسری جانب درآمدکنندگان نے بتایاکہ پانچ میں سے چار کنٹینرز فروخت ہو گئے ہیں اور ایک کنٹینر میں 24 ٹن کالا چنا لوڈ ہے۔انہوں نے بتایاکہ ہمارا مال اچھی کوالٹی کا ہے اور ہمارے پاس اس کی ٹیسٹ رپورٹ بھی ہے جس سے ہم ثابت کر سکتے ہیں کہ ہمارے مال میں شکایت نہیں ہے۔
