لاہور: (نیوز ڈیسک) عوام کیلئے ایک کے بعد ایک مشکل، چکی آٹا 5 روپے کلو مزید مہنگا کر دیا گیا، دیسی آٹے کی فی کلو قیمت 175 روپے ہوگئی۔ مہنگائی کے طوفان نے سب کچھ اپنی لپیٹ میں لے لیا، چکی آٹا 5 روپے مزید مہنگا ہو کر 175 روپے فی کلو تک جا پہنچا ہے۔
آٹا چکی اونرز ایسوسی ایشن کی جانب سے نئی قیمت کا اطلاق بھی کر دیا گیا، مہنگی گندم اور بجلی کو آٹا مہنگے کرنے کا جواز قرار دیا گیا ہے۔ مارکیٹ ذرائع کے مطابق منڈی میں گندم 4 ہزار 900 سے 4 ہزار 920 روپے فی من بیچی جا رہی ہے، گزشتہ ایک ہفتے میں گندم 150 سے 200 روپے فی من تک مہنگی ہوئی جبکہ بجلی مہنگی ہونے سے بھی گندم کے پیداواری اخراجات بڑھ رہے ہیں۔
ادھر مارکیٹ میں 20 کلو آٹے کا تھیلا 2750 سے 2850 روپے میں دستیاب ہے جبکہ کھلا سرخ آٹا 140 اور سفید فائن آٹا 150 روپے فی کلو بیچا جا رہا ہے۔مارکیٹ ذرائع کے مطابق آٹے کے تھیلے کے نرخ بھی بڑھنے کا امکان ہے۔
دوسری جانب عوام کا کہنا ہے کہ پہلے ہی مہنگائی درد سر بن چکی ہے، اب آٹا بھی مہنگا کر کے مشکلات بڑھا دی گئی ہیں، روٹی تو انسان کی بنیادی ضرورت ہے، کم از کم حکومت آٹے کے نرخوں کو ہی قابو کر لے تاکہ غریب دو وقت کی روٹی تو کھا سکے۔
