بغداد : ( نیوز ویب ڈیسک ) سویڈن میں قرآن پاک کے نسخے کو نذر آتش کرنے کے خلاف جاری احتجاج کے دوران سینکڑوں مظاہرین نے عراق کے دارالحکومت بغداد میں سویڈش سفارت خانے پر دھاوا بول دیا اور اسے آگ لگا دی۔
غیر ملکی خبر رساں ادارے کے مطابق احتجاج کی کال عراق کے شیعہ عالم مقتدیٰ صدر کے حامیوں کی جانب سے سویڈن میں مسلمانوں کی مقدس کتاب کو جلانے کے ایک اور مبینہ منصوبے کی توقع میں دی گئی ۔
واضح رہے کہ گزشتہ روز سویڈن کی خبر رساں ایجنسی ٹی ٹی نے رپورٹ کیا تھا کہ سویڈش پولیس نے 20 جولائی بروز جمعرات کو سٹاک ہوم میں عراقی سفارت خانے کے باہر ایک عوامی احتجاج کے لیے ایک درخواست منظور کی ہے جس میں کہا گیا ہے کہ درخواست گزار قرآن پاک کے نسخے اور عراقی پرچم کو نذر آتش کرنا چاہتا ہے۔
ٹی ٹی کے مطابق مظاہرے میں دو افراد کو شرکت کی اجازت دی گئی اور ان میں سے ایک وہی شخص ہے جس نے جون میں سٹاک ہوم کی ایک مسجد کے باہر قرآن پاک کے نسخے کو نذر آتش کیا تھا۔
خبر رساں ادارے کے مطابق بغداد میں سینکڑوں مظاہرین نے جمعرات کو علی الصبح سویڈن کے سفارت خانے پر دھاوا بول دیا اور اسے آگ لگا دی ، تاہم اس دوران سفارت خانے کے عملے کے کسی رکن کو کوئی نقصان نہیں پہنچا۔
مقامی میڈیا کے مطابق سینکڑوں لوگوں نے عراقی مذہبی رہنما مقتدیٰ صدر کی اپیل پر بغداد میں سویڈن کے سفارت خانے کے باہر احتجاج کیا اور مظاہرین نے احتجاج کے دوران عراقی حکومت سے سویڈن کے ساتھ سفارتی تعلقات منقطع کرنے کا مطالبہ کیا ۔
???? محتجون يقتحمون #سفارة_السويد في بغداد ويشعلون النار فيها.
???? وزارة الخارجية العراقية تدين بأشد العبارات حادثة حرق السفارة السويدية لدى #بغداد.
???? وزارة الخارجية السويدية تؤكد أن الهجمات على السفارات والدبلوماسيين تشكل انتهاكا خطيرا لاتفاقية فيينا.
???? وزارة الخارجية السويدية… pic.twitter.com/ukytD50mhQ
— الحرة عراق (@AlhurraIraq) July 20, 2023
عراق کی وزارت خارجہ نے اس واقعے کی مذمت کرتے ہوئے ایک بیان میں کہا ہے کہ عراقی حکومت نے سکیورٹی فورسز کو ہدایت کی ہے کہ وہ اس کی فوری تحقیقات کریں، مجرموں کی شناخت کریں اور ان کا محاسبہ کریں۔
سویڈن کی وزارت خارجہ نے تصدیق کی کہ بغداد میں اس کے سفارت خانے کے تمام ملازمین محفوظ ہیں اور مظاہرین کی آمد سے ایک گھنٹہ قبل سفارت خانے کے پورے عملے کو باہر نکال لیا گیا تھا۔
یاد رہے کہ اس سے قبل گزشتہ ماہ جون میں عید الاضحیٰ کے موقع پر سویڈن کے دارالحکومت سٹاک ہوم میں ایک مسجد کے باہر ایک شخص نے قرآن پاک کے نسخے کو نذر آتش کیا تھا اور اس واقعے نے مسلم دنیا میں بہت سے لوگوں کو ناراض کیا جبکہ عراقی حکام کی طرف سے بھی اس کی مذمت کی گئی ۔
سویڈن میں قران پاک کی بے حرمتی پر ایران کے وزیر خارجہ حسین امیرعبداللہیان نے اس ماہ کے شروع میں کہا تھا کہ ان کا ملک احتجاجاً سویڈن میں نیا سفیر نہیں بھیجے گا۔
مصر نے قرآن مجید کے نسخے کو نذر آتش کرنے کو ایک شرمناک عمل قرار دیا تھا اور سعودی عرب نے کہا تھا کہ اس طرح کی نفرت انگیز کارروائیوں کو کسی جواز کے ساتھ قبول نہیں کیا جا سکتا جبکہ ملائیشیا کے وزیر خارجہ نے کہا تھا کہ ایک اہم تہوار کے دوران مقدس کتاب کی بے حرمتی دنیا بھر کے مسلمانوں کے لیے ناگوار ہے۔
