22 افراد تاحال لاپتہ ہیں‘22 نامعلوم لاشیں ہیں جن کی شناخت کرنے کی کوشش کر رہے ہیں. صوبائی گورنر
تہران ( انٹرنیشنل ڈیسک ) ایرانی بندرگاہ پر دھماکے اور آگ لگنے سے مرنے والوں کی تعداد 70 ہو گئی اور ہرمزگان کے گورنر کے مطابق 22 افراد تاحال لاپتہ ہیں جب کہ 22 نامعلوم لاشیں ہیں جن کی فرانزک ڈاکٹرز شناخت کرنے کی کوشش کر رہے ہیں ایران کی وزارت داخلہ نے اعلان کیا کہ آگ بجھانے کا آپریشن ختم ہو گیا ہے جبکہ ہرمزگان کے گورنر نے کہا ہے کہ متاثرین کے لیے امدادی کارروائیاں ابھی بھی جاری ہیں اور ہمیں علاقے کی صفائی میں کئی دن لگیں گے کنٹینرز کو منتقل کرنے میں دو ہفتے تک لگ سکتے ہیں.
دوسری جانب دھماکے کی تحقیقات کرنے والی کمیٹی نے کہا ہے کہ کمیٹی کی رائے میں حفاظتی اصولوں پر عمل نہ کرنا اور غیر فعال دفاع واضح ہے ایک بیان میں کمیٹی نے کہا کہ کچھ معاملات میں بیانات جھوٹ پر مبنی تھے‘ سکیورٹی اور عدالتی ادارے قصورواروں کی شناخت کے لیے کوشاں ہیں. عرب نشریاتی ادارے کے مطابق بیان میں یہ بھی کہا گیا ہے کہ اس واقعے کی وجہ کا تعین کرنے کے لیے اس کے مختلف پہلوﺅں کی مکمل اور جامع جانچ کی ضرورت ہے جس کے لیے ماہرین کی ضروریات کے مطابق، تکنیکی اور لیبارٹری کے عمل کی ضرورت ہے.
ایرانی وزیر داخلہ سکندر مومنی نے کہا ہے کہ کرائسس ہیڈ کوارٹر اور صوبائی سکیورٹی کونسل کے مشترکہ اجلاس منعقد کیے گئے ہیں کچھ ممکنہ ذمہ داروں کو طلب کیا گیا ہے جبکہ کچھ کی تلاش جاری ہے.
