اسلام آباد(این این آئی)پاکستان نے انٹرنیشنل مانیٹری فنڈز(آئی ایم ایف)کو 3ارب 60کروڑ ڈالر سے زائد سود ادا کر دیا، یہ رقم پاکستانی کرنسی میں 1004ارب روپے سے زائد بنتی ہے۔دستاویز کے مطابق 30برسوں میں آئی ایم ایف سے تقریباً 29ارب ڈالر قرض لیا گیا جبکہ اس عرصہ میں 21ارب 72کروڑ ڈالر سے زائد قرض واپس کیا گیا۔گزشتہ 4سال میں آئی ایم ایف سے 6ارب 26کروڑ ڈالر سے زائد قرض لیا گیا، اس دوران آئی ایم ایف کو 4ارب 52کروڑ 85لاکھ ڈالر واپس کیے گئے۔دستاویز کے مطابق گزشتہ 4سال میں پاکستان کی جانب سے عالمی مالیاتی ادارے کو 1ارب 10کروڑ ڈالر سے زائد سود ادا کیا گیا۔
