سرکاری وسائل سے سیاسی تشہیر پر سخت سے سخت کارروائی ہونی چاہیئے، عطا تارڑ

اس گھناؤنے عمل پر کل ایک ارب روپے سے زائد رقم خرچ کی گئی‘ خیبرپختونخوا میں پی ٹی آئی حکومت نے سوشل میڈیا ٹرولرز بھرتی کیے، ایسے لوگوں کو کیفر کردار تک پہنچانا قومی فریضہ ہے۔ ن لیگی رہنماء کی گفتگو

اسلام آباد (نیوز ڈیسک) پاکستان مسلم لیگ ن کے رہنما عطاء تارڑ نے کہا کہ تحریک انصاف نے ریاست مخالف پروپیگنڈے کیلئے سرکاری پیسے کا استعمال کیا، اس گھناؤنے عمل پر کل ایک ارب روپے سے زائد رقم خرچ کی گئی، جن مجرموں نے ان 1100 لوگوں کو بھرتی کیا ان کے خلاف کارروائی ہونی چاہیے، ایسے لوگوں کو کیفر کردار تک پہنچانا قومی فریضہ ہے۔
میڈیا سے گفتگو کرتے ہوئے انہوں نے کہا کہ ہمارے پاس تفصیلات ہیں کس سفاکانہ طریقے سے عوامی پیسے کو لوٹا گیا، خیبرپختونخوا میں تحریک انصاف کی حکومت نے سوشل میڈیا ٹرولرز بھرتی کیے، 2019ء میں خیبرپختونخوا حکومت نے سوشل میڈیا انفلوئنسرز کے طور پر 1100 لوگ بھرتی کیے، جس کا مقصد صحافیوں، سیاستدانوں کو گالیاں دینا تھا، کیا یہ نوکریاں تحریک انصاف کی ملکیت تھیں؟ پارٹی کی تشہیر کیلئے پارٹی فنڈز سے پیسے جاری ہونے چاہئیں تھے لیکن غریب عوام کے 87 کروڑ روپے خرچ کیے گئے، غریب سے دوائی، روٹی اور تعلیم کا حق چھینا گیا، سرکاری خزانے سے معاوضہ دے کر اداروں کے خلاف بیان بازی کی گئی، اس معاملے پر سخت سے سخت کارروائی ہونی چاہیے۔
خیال رہے کہ پاکستان تحریک انصاف کے دور حکومت میں سرکاری وسائل سیاسی تشہیری مہم کیلئے استعمال کرنے کا انکشاف ہوا ہے، میڈیا رپورٹس میں ذرائع کے حوالے سے بتایا گیا ہے کہ 80 کروڑ 70 لاکھ روپے کی لاگت سے سوشل میڈیا ٹیمیں بنائی گئیں، اس کے لئے 25 ہزار سے 40 ہزار روپے تنخواہ پر ملازمین کو بھرتی کیا گیا، جن کی مدد سے سوشل میڈیا اکاؤنٹس کو پی ٹی آئی قیادت کی تشہیر کے لیے استعمال کیا گیا۔
ذرائع سے معلوم ہوا ہے کہ یہ سوشل میڈیا اکاؤنٹس مخالفین کے خلاف پروپیگنڈے کے لیے استعمال ہوئے، ان پروپیگنڈا اکاؤنٹس کے فالوورز سرکاری وسائل سے بڑھائے گئے، حکومتی دور کے اختتام پر یہ اکاؤنٹس پی ٹی آئی کارکنان استعمال کرتے رہے، یہ اکاؤنٹس 9 مئی کو پی ٹی آئی کارکنوں کو اشتعال دلانے کیلئے بھی استعمال ہوئے۔