لاہور: (نیوز ڈیسک) مسلم لیگ (ن ) کی چیف آرگنائزر مریم نواز سے خیبرپختونخوا میں یوتھ ڈویژنل کمیٹیاں مقرر کرنے کیلئے آرگنائزنگ کمیٹی کے ہمراہ نوجوان نمائندوں نے ملاقات کی جس میں صوبے کے 7 ڈویژنز میں آرگنائزنگ کمیٹیاں تشکیل دینے کی تجویز دی گئی۔
اجلاس کے دوران کمیٹیوں کے ناموں پر مشاورت کے بعد ان کے قیام کو حتمی شکل دی گئی جس کا جلد ہی باضابطہ نوٹیفکیشن بھی جاری کر دیا جائے گا، مریم نواز شریف نے آرگنائزنگ کمیٹی کو جلد از جلد دیہات کی سطح پر کوآرڈینیٹرز مقرر کرنے کی ہدایت بھی کی۔
اس موقع پر گفتگو کرتے ہوئے مریم نواز نے کہا ہے کہ نوجوان پاکستان کا قیمتی اثاثہ ہیں اور پاکستان کی آبادی کا غالب حصہ ہیں، مسلم لیگ (ن) کے قائد نواز شریف نوجوانوں کو مستقبل کی قیادت بنانا چاہتے ہیں اور اُنہیں فیصلہ سازی کے عمل میں آگے لانا چاہتے ہیں، اسی وژن کی روشنی میں تنظیم سازی کا ملک گیر عمل شروع کیا گیا ہے جس میں نوجوانوں اور خواتین کو آگے لایا جا رہا ہے۔
مسلم لیگ (ن) کی چیف آرگنائزر مریم نواز نے کہا ہے کہ آئندہ انتخابات میں نوجوانوں کا کردار خصوصی اہمیت کا حامل ہے، انتخابات میں ملک بھر کے نوجوانوں کا ووٹ پاکستان کے مستقبل کا فیصلہ کرے گا اور سمت کا تعین کرے گا، نوجوان اپنے ووٹ کی طاقت سے تعمیر، ترقی اور خوش حالی کی قوتوں کو کامیاب بنائیں گے اور بندوق، پٹرول بم اور تشدد کی قوتوں کو شکست دیں گے۔
مریم نواز نے مزید کہا ہے کہ انتخابات میں نوجوان لیپ ٹاپ دینے والوں کا ساتھ دیں گے، بندوق ، پٹرول بم اور تشدد پر اکسانے والی منفی قوتوں کو مسترد کریں گے، نوجوانوں کو 9 مئی جیسے یوم سیاہ کے منصوبہ سازوں کی سازشوں کا ایندھن نہیں بننے دیں گے، خیبرپختونخوا کو مسلم لیگ (ن) کا قلعہ بنائیں گے، صوبے میں دس سال کی محرومیوں کا خاتمہ کریں گے۔
آئندہ عام انتخابات میں ملک بھر کے نوجوانوں کا ووٹ پاکستان کے مستقبل کا فیصلہ کرے گا:مریم نوازشریف
، نوجوان ووٹ کی طاقت سے تعمیر، ترقی اور خوش حالی کی قوتوں کو کامیاب بنائیںگے
بندوق، پٹرول بم اور تشدد کی قوتوں کو شکست دیں گے
پاکستان مسلم لیگ (ن )کی نائب صدر اور چیف آرگنائزر… pic.twitter.com/UHj59Lnhxq
— PMLN (@pmln_org) August 7, 2023
