اسلام آباد: (نیوز ڈیسک) وفاقی وزیر خزانہ اسحاق ڈار نے ایئر چیف مارشل ظہیر احمد بابر سندھو سے ملاقات کی، ملاقات میں بین الاقوامی معاشی صورتحال اور علاقائی سلامتی کے ماحول پر تبادلہ خیال کیا گیا۔
ترجمان پاک فضائیہ کے مطابق ایئر چیف نے پاک فضائیہ کو جدت سے استوار کرنے اور مقامی صلاحیتوں کے فروغ کے لیے جاری مختلف منصوبوں کا تذکرہ کیا، سربراہ پاک فضائیہ نے وزیر خزانہ کو پاک فضائیہ کے نیشنل ایرو سپیس سائنس اینڈ ٹیکنالوجی پارک پراجیکٹ سے آگاہ کیا۔
17 July, 2023: Finance Minister of Pakistan, Mr Muhammad Ishaq Dar, called on Air Chief Marshal Zaheer Ahmed Baber Sidhu, Chief of the Air Staff, Pakistan Air Force during his visit to Air Headquarters, Islamabad today. pic.twitter.com/3u8t2V8YDr
— DGPR (AIR FORCE) (@DGPR_PAF) July 17, 2023
سربراہ پاک فضائیہ کے مطابق نیشنل ایرو سپیس سائنس اینڈ ٹیکنالوجی پارک پراجیکٹ سے ایوی ایشن، سپیس، آئی ٹی، سائبر اور کمپیوٹنگ کے شعبوں میں مشترکہ تحقیق، ترقی اور اختراع کو فروغ ملے گا، نیشنل ایرو سپیس سائنس اینڈ ٹیکنالوجی پارک پراجیکٹ کے ذریعے پاکستان کے لیے اقتصادی، تکنیکی اور سائنسی فوائد کا حصول یقینی بنایا جائے گا۔
ایئر چیف مارشل ظہیر احمد بابر سدھو نے معیشت کو ترقی اور استحکام کی جانب گامزن کرنے کے لیے حکومت کی عملی پالیسیوں اور اقدامات کی تعریف کی، وزیر خزانہ اسحاق ڈار نے بھی پاک فضائیہ کے اہلکاروں کی بے مثال پیشہ ورانہ مہارت کو سراہا۔
اسحاق ڈار نے کہا کہ حکومت پاکستان، پاک فضائیہ کو جدید خطوط پر استوار کرنے کے لیے اپنے تمام تر وسائل بروئے کار لائے گی، وزیر خزانہ نے پاکستان کو ایک خوشحال اور معاشی طور پر مستحکم ملک بنانے کی غرض سے حکومت پاکستان کی جانب سے نافذ کی جانے والی اقتصادی پالیسیوں اور وسیع منصوبوں کا ذکر کیا۔
ترجمان پاک فضائیہ کے مطابق وزیر خزانہ نے پاک فضائیہ کی آپریشنل تیاریوں پر مکمل اعتماد کا اظہار کیا، اسحاق ڈار کی جانب سے بہترین صلاحیتوں سے لیس اور ہنرمند فضائی اہلکاروں کی تیاری و تربیت پر سربراہ پاک فضائیہ کی تعریف کی گئی۔
اسحاق ڈار نے کہا کہ پاک فضائیہ کی جانب سے تربیت حاصل کرنے والے یہ اہلکار ملک کے فضائی دفاع اور قومی سلامتی کے بدلتے چیلنجوں سے نمٹنے کی بھر پور صلاحیت رکھتے ہیں۔
