وزیر داخلہ شیخ رشید احمد نے ملک میں عاشورہ کے دوران امن و امان کی صورتحال پر اطمینان کا اظہار کیا ہے۔
اپنے بیان میں وزیر داخلہ نے کہا کہ سینٹرل کنٹرول روم کے مطابق یوم عاشور کے کم و بیش تمام جلوس اختتام پذیر ہوچکے ہیں، ملک بھر میں مجالس کا سلسلہ جاری ہے۔
ان کا کہنا تھا کہ عاشورہ کے دوران ملک بھر میں امن و امان کی صورتحال تسلی بخش رہی۔
وزیر داخلہ نے کہا کہ مجموعی امن و امان کے لیے پولیس، سول آرمڈ فورسز، قانون نافذ کرنے والے ادارے مبارکباد کے مستحق ہیں۔
شیخ رشید کا کہنا تھا کہ وفاقی، صوبائی حکومتوں، آزاد جموں و کشمیر، گلگت بلتستان پولیس کو امن و امان برقرار رکھنے پر شاباش دیتا ہوں۔
انہوں نے سول آرمڈ فورسز، قانون نافذ کرنے والے اداروں کو بھی انتظامیہ کی مدد کرنے پر خراجِ تحسین پیش کیا۔