مودی بوکھلاہٹ میں کوئی حرکت کرسکتا ہے مگر اس کے عالمی اثرات ہوں گے

مودی کونے میں لگا ہوا ہے اس کا سیاسی سرمایہ ختم ہوگیا ہے، مودی نے اگر کوئی قدم اٹھایا تو ساری دنیا ایک ہی کیمپ میں اکٹھی ہوجائے گی۔ وزیردفاع خواجہ آصف

اسلام آباد ( نیوز ڈیسک ) وزیردفاع خواجہ آصف نے کہا ہے کہ مودی بوکھلاہٹ میں کوئی حرکت کرسکتا ہے مگر اس کے عالمی اثرات ہوں گے،مودی کونے میں لگا ہوا ہے اس کا سیاسی سرمایہ ختم ہوگیا ہے۔ انہوں نے نجی نیوز چینل کے پروگرام میں گفتگو کرتے ہوئے کہا کہ دوبارہ بھارتی جارحیت کا امکان موجود ہے، بھارت نے دوبارہ جارحیت کی تو ہمارا جواب اور عالمی ردعمل دونوں آئیں گے۔
مودی کونے میں لگا ہوا ہے اس کا سیاسی سرمایہ ختم ہوگیا ہے، مودی بوکھلاہٹ میں کوئی حرکت کرسکتا ہے مگر اس کے عالمی اثرات بہت ہوں گے،مودی نے اگر کوئی قدم اٹھایا تو ساری دنیا ایک ہی کیمپ میں اکٹھی ہوجائے گی۔امریکا نے ہمیں کہا کہ ہم نے جنگ بندی کیلئے جو قدم اٹھایا اس میں ہمارے امریکا اور دوست ممالک چین ، سعودی عرب، یواے ای، ترکیہ سارے آن بورڈ تھے، سب نے کہا کہ آپ سیز فائر پر مان جائیں، ہم نے ان کے کہنے پر سیز فائر کیا۔
سیز فائر کیلئے ہمارے اوپر کوئی دباؤ نہیں تھا۔ کشمیر پر بات کرنے کا راستہ کھل گیا ہے، یہ پاکستان کی بہت بڑی کامیابی ہے، کہ کشمیر پر بات چیت کا راستہ کھل گیا ہے۔ مزید برآں وزیراعظم شہبازشریف نے آرمی چیف سید جنرل عاصم منیر اور ایئرچیف ظہیر احمد بابر، وزراء اور افسران کے ہمراہ پسرورسیالکوٹ کینٹ کا دورہ کیا، جہاں پر وزیراعظم شہبازشریف نے افواج پاکستان کے افسروں اورجوانوں سے خطاب کرتے ہوئے کہا کہ افواج پاکستان کو دشمن کے خلاف عظیم کامیابی پر مبارکباد پیش کرتا ہوں، یہ کامیابی رہتی دنیا تک تاریخ کے سنہری باب کا حصہ بن چکی ہے۔
جس طرح افواج پاکستان نے 24کروڑ عوام اور پاکستان کا وقار بڑھایا اس کیلئے میرے پاس الفاظ نہیں ہیں۔اتنی اعلیٰ عسکری مہارت جرات مندی سے مقابلہ کیا۔ دشمن ہم سے تعداد میں کئی گنا بڑا ہے، وہ ناز کرتا تھا کہ اربوں ڈالر کا جنگی سازوسامان خریدا ہے دشمن کو غرور تھا لیکن ہمارے جوانوں نے دشمن کے دانت توڑ دیئے اور غرور خاک میں ملا دیا۔کورکمانڈر نے بتایا کہ ایک چوکی تھی وہاں آپ نے کس طرح دفاع کیا، دشمن کو ایک انچ بھی آگے نہیں بڑھنے دیا۔
ہمارے شاہیوں نے دشمن کے جہازوں کو برباد کیا اور جوانوں نے دشمن کے ٹھکانوں کو تباہ کردیا ہے۔ہندوستان سمجھتا تھا کہ دشمن روائتی جنگوں میں ہم سے بہت پیچھے رہ گیا ہے، لیکن اللہ کے کرم سے روائتی جنگ میں بھی کامیابی حاصل کی گئی۔ شہبازشریف نے کہا کہ آرمی چیف جنرل عاصم منیر نے دلیری اور دانشمندی سے جنگ کی منصوبہ بندی کی اس کا میں ذاتی طور پر گواہ ہوں۔
کیونکہ ان دنوں میں میر ی ان سے ٹیلیفون پر اور براہ راست ملاقات ہوتی تھی، مجھے ان پر فخر ہے، یہ قوم کے بیٹے ہیں، اسی طرح ایئر چیف نے مجھے بتایا کہ وہ کون سی ٹیکنالوجی لے کر آئے۔ وزیراعظم شہبازشریف نے کہا کہ مسٹرمودی! پاکستان امن چاہتا ہے، اگر دوبارہ ایسی حرکت کی تو منہ کی کھاؤ گے، پانی روکنے کی کوشش کی تو واضح کرتے ہیں کہ پانی اور خون ساتھ نہیں چل سکتے، اگر ہمارے نیل جہلم ڈیم کو نقصان ہوتا تو ہم آپ کے سارے ڈیمز تباہ کردیتے، اب مربوط ڈائیلاگ ہوگا میٹھا میٹھا ہپ ہپ ہم نہیں ہونے دیں گے۔