عالمی برادری خطے کی صورتحال کا نوٹس لے، بھارت خطے کو جنگ کی طرف دھکیلنا چاہتا ہے، بھارتی فضائیہ کی مہم جوئی کےعزائم کوہم نے لمحوں میں ناکام بنایا؛ تقریب سے خطاب
اسلام آباد ( نیوز ڈیسک ) نائب وزیراعظم اور وزیر خارجہ اسحاق ڈار کا کہنا ہے کہ کسی کے خلاف اپنی سرزمین استعمال ہونے دینے کا سوچ بھی نہیں سکتے، بھارت خطے کو جنگ کی طرف دھکیلنا چاہتا ہے، پاکستان کسی صورت پہلا قدم نہیں اٹھائے گا لیکن جارحیت مسلط کی گئی تو پورے قومی عزم اورطاقت سے جواب دیں گے۔ اسلام آباد میں تقریب سے خطاب کرتے ہوئے انہوں نے کہا کہ پہلگام واقعےکا مقدمہ 10 منٹ بعد جس پولیس سٹیشن میں درج کیا گیا وہاں پہنچنے میں ہی 45 منٹ لگتے ہیں، پاکستان اس افسوسناک واقعے میں بالکل ملوث نہیں، پہلگام فالس فلیگ بھارت کا رچایا ہوا ڈرامہ ہے، بھارت دنیا کو بے وقوف نہ بنائے، پہلگام ڈارمے کا مقصد بھارت میں جاری تحریکوں سے توجہ ہٹانا تھا، کئی بھارتی ریاستوں میں انسانی حقوق کی سنگین خلاف ورزیاں ہورہی ہیں۔
اسحاق ڈار کا کہنا ہے کہ قومی سلامتی کمیٹی نے واضح کیا کہ پانی کی بندش یا رخ موڑنا جنگی اقدام تصور ہوگا، بھارت یکطرفہ طور پر سندھ طاس معاہدے کومعطل یا ختم کرنے کا مجاز نہیں، سندھ طاس معاہدے کو معطل کرنا عالمی قوانین کی سنگین خلاف ورزی ہے، بھارت خطے کو جنگ کی طرف دھکیلنے کی کوشش کررہا ہے، بھارت خطےمیں لاکھوں لوگوں کی زندگیوں کوخطرات میں ڈال رہا ہے، پاکستان نے ہمیشہ جارحیت کےخلاف آواز اٹھائی، پاکستان ہمیشہ خطے میں امن کا داعی رہا ہے۔
وزیر خارجہ نے کہا کہ بھارتی پابندیوں کے بعد قومی سلامتی کمیٹی نے اہم فیصلے کیے، قومی سلامتی کمیٹی کے فیصلوں پر فوری عملدرآمد کیا گیا، عالمی رہنماؤں نے پاکستان کو تحمل کا مظاہرہ کرنے درخواست کی، ہرقسم کی دہشت گردی کی مذمت کرنا ہماری پالیسی ہے، خطے میں صورتحال تبدیل ہو رہی ہے، پاکستان کسی بھی صورتحال میں پہلا قدم نہیں اٹھائے گا لیکن جارحیت مسلط کی گئی توپورے قومی عزم اورطاقت سے جواب دیں گے، بھارتی فضائیہ کی مہم جوئی کےعزائم کوہم نے لمحوں میں ناکام بنایا، عالمی برادری خطے کی صورتحال کا نوٹس لے۔
