بلیک میلنگ کی سیاست کا خاتمہ ہوچکا ہے، پاکستان کے مفاد پر کسی کو سیاست نہیں کرنے دیں گے، وزیر اعظم نے دن رات ملک کی خدمت کرکے قوم کا اعتماد بحال کیا؛ حنیف عباسی کی میڈیا سے گفتگو
راولپنڈی ( نیوز ڈیسک ) وفاقی وزیر ریلوے حنیف عباسی کا کہنا ہے کہ مسلم لیگ ن اور پیپلزپارٹی میں کوئی اختلاف نہیں ہے، دونوں جماعتیں اسی تنخواہ پر کام کرتی رہیں گی، پاکستان کے نام پر کسی کو سیاست نہیں کرنے دیں گے، فیڈریشن کو کسی کو نقصان پہنچانے کی اجازت نہیں دیں گے۔ راولپنڈی میں میڈیا سے گفتگو کرتے ہوئے انہوں نے کہا کہ وزیر اعظم نے دن رات ملک کی خدمت کرکے قوم کا اعتماد بحال کیا، بین الاقوامی اعشاریے بہتری کی نوید دے رہے ہیں، جو کہتے تھے پاکستان پیسے نہ بھیجیں، ان کی بات کسی نے نہیں سنی، ہمارے لیے پاکستان سب چیزوں سے مقدم ہے، حکومت نے پٹرولیم مصنوعات کی قیمتوں کا فائدہ بلوچستان کو دینے کا فیصلہ کیا ہے، اسی طرح وزیراعلیٰ پنجاب دن رات صوبے کی عوام کیلئے کام کررہی ہے،سندھ میں بھی کام ہورہا ہے، راولپنڈی میں تجاوزات کا ہم نے خاتمہ کیا، پنجاب میں صحت پر ریکارڈ کام ہوا ہے، کے پی کے میں پی ٹی آئی کی سترہ سال سے حکومت ہے لیکن راولپنڈی اسلام آباد میں سب سے زیادہ مریض وہاں سے آتے ہیں۔
حنیف عباسی کہتے ہیں کہ افغانستان سے بات چیت وزیر اعلیٰ کے پی کے کہنے پر شروع نہیں کی، حکومت کا فیصلہ ہے کہ بات چیت ہونی چاہیئے، اسی لیے ڈپٹی وزیراعظم وہاں گئے ہیں، وہاں سے کہا گیا ہے کہ افغانستان کی سرزمین پاکستان کے خلاف استعمال نہیں ہوگی، افغانستان کے ساتھ جو بھی مسائل ہیں، ان کو وفاقی سطح پر دیکھا جارہا ہے، اس کے علاوہ سندھ اور بلوچستان کے درمیان خونی سڑک کو اب بڑے پراجیکٹ میں تبدیل کرنے جارہے ہیں جس کے لیے پٹرولیم پرائس کی بچت وہاں منتقل کی جارہی ہے۔
اپنے محکمے سے متعلق انہوں نے بتایا کہ ریلوے کے آٹھ ڈی ایس ہیں سب کو کہا ہے کہ سرکار کی ایک انچ زمین پر کسی کا قبضہ نہیں رہنا چاہیئے، صاف پانی صفائی اور بہتر کھانا ریلوے میں ہونے کو یقینی بنانے کے لیے فوڈ اتھارٹی والے اب چھاپے ماریں گے، راولپنڈی میں ہمارے بہت سے خواب ہیں جن کی تکمیل چاہتے ہیں جب پی کے ایل آئی راولپنڈی کی کڈنی ٹرانسپلانٹ شروع کرے گا تو ہمارا ایک اور خواب پورا ہوگا۔
