اسلام آباد 🙁 نیوز ڈیسک ) اسلام آباد ہائی کورٹ نے ڈاکٹر عافیہ صدیقی رہائی اور وطن واپسی سے متعلق کیس کی سماعت کی، عدالت کو آگاہ کیا گیا کہ ڈاکٹر عافیہ کے امریکہ میں وکیل مسٹر کلائیو سمتھ 4 مئی کو پاکستان آرہے ہیں۔ اسلام آباد ہائیکورٹ کے جسٹس سردار اعجاز اسحاق خان نے کیس کی سماعت کی، نئے تعینات ایڈیشنل اٹارنی جنرل عمر اسلم پیش نہ ہو سکے، دوران سماعت عدالت نے عمران شفیق ایڈووکیٹ کی مسٹر کلائیو سمتھ سے مشاورت کے لیے وقت مانگنے کی استدعا منظور کر لی۔
ڈاکٹر عافیہ صدیقی کی رہائی اور وطن واپسی سے متعلق کیس کی سماعت کے دوران وکیل عمران شفیق ایڈوکیٹ نے عدالت کو آگاہ کیا کہ ڈاکٹر عافیہ صدیقی کے امریکا میں وکیل مسٹر کلائیو سمتھ 4 مئی کو پاکستان آرہے ہیں، انہوں نے استدعا کی کہ کلائیو سمتھ کی پاکستان آمد تک اگلی سماعت 6 مئی کو رکھ لی جائے۔
عدالت نے لاء افسر و وزارت خارجہ حکام سے استفسار کیا کہ آپ کو اعتراض تو نہیں، لاء افسر نے جواب دیا کہ ہمیں اعتراض نہیں، بعد ازاں عدالت نے عافیہ صدیقی سے متعلق کیس کی سماعت 6 مئی تک ملتوی کردی۔
