چیف جسٹس سپریم کورٹ آف پاکستان، جسٹس یحییٰ آفریدی کی سربراہی میں 3 رکنی بینچ پنجاب حکومت کی اپیلوں پر سماعت کرے گا
اسلام آباد ( نیوز ڈیسک ) 9 مئی کے مقدمات میں ملزمان کی ضمانتوں کیخلاف درخواستیں سماعت کیلئے مقرر کر دی گئیں،چیف جسٹس سپریم کورٹ آف پاکستان، جسٹس یحییٰ آفریدی کی سربراہی میں 3 رکنی بینچ پنجاب حکومت کی اپیلوں پر سماعت کرے گا۔ جسٹس شفیع صدیقی اور جسٹس شکیل احمد بینچ کا حصہ ہوں گے،جی ایچ کیو حملہ کیس کے ملزمان کی ضمانتوں کیخلاف پنجاب حکومت کی اپیلوں پر سماعت 7 اپریل کو ہوگی جبکہ پی ٹی آئی رہنماءعالیہ حمزہ سمیت 20 ملزمان کی ضمانت منسوخی کیلئے دائر اپیلوں پر سماعت 8 اپریل کو ہوگی۔
پنجاب حکومت نے ملزمان کی ضمانتوں کی منسوخی کیلئے سپریم کورٹ سے رجوع کیا تھا۔یاد رہے کہ اس سے قبل سپریم کورٹ میں 9 اور 10 مئی کے رواں اور آئندہ ہفتے مقرر تمام مقدمات ڈی لسٹ کر دیئے گئے تھے۔
چیف جسٹس آف پاکستان یحییٰ آفریدی کی سربراہی میں تین رکنی بینچ نے 9 مئی ملزمان کی ضمانت منسوخی کی اپیلوں پر سماعت کی تھی۔ سینئر وکیل ذوالفقارنقوی نے کہا کہ پنجاب حکومت نے مجھے 9 مئی مقدمات میں وکیل مقرر کیا تھا۔
عدالت سے استدعا کی تھی کہ تیاری کیلئے وقت دیا جائے۔چیف جسٹس پاکستان یحییٰ آفریدی نے ریمارکس دیتے ہوئے کہا تھاکہ نو مئی کے مقدمات تو کل اور پرسوں بھی مقرر کئے گئے تھے گزشتہ سماعتوں پر ایڈیشنل پراسیکیوٹر پیش ہو کر وقت مانگتے رہے تھے۔ آپ وقت مانگ رہے ہیں۔ ایسے نہیں چلے گا، یہ کوئی ایک کیس نہیں پچاس کے قریب اپیلیں تھیں۔وکیل ذوالفقار نقوی نے کہا کہ رواں ہفتے کے مقدمات ملتوی کردی جائیں۔
آئندہ ہفتے والوں کی تیاری کر کے آوں گا۔چیف جسٹس نے کہا تھاکہ کچھ اپیلیں کیس منتقلی کے حوالے سے بھی ہیں۔ کیس منتقلی کا معاملہ ختم ہو چکا اس پر حکومت سے ہدایات لے لیں جس پر ذوالفقار نقوی نے کہا کہ جج کا تبادلہ ہو چکا صرف جرمانے اور کچھ آبزرویشنز کی حد تک اپیل کی پیروی کریں گے۔بعدازاں عدالت نے نو مئی اور دس مئی کے رواں اور آئندہ ہفتے مقرر تمام مقدمات ڈی لسٹ کر دئیے اور کہا تھاکہ پنجاب حکومت کی مہلت کی استدعا منظور کرلی تھی۔
