مینڈیٹ چور وزیراعظم کی گفتگو جاہلانہ اور جھوٹ کا پلندہ ہے

مہنگائی کو کم کرنے اور معیشت بچانے کا جھوٹ ہانکنے والا مسخرہ بجلی کی فی یونٹ قیمت کو اپریل 2022 کی سطح پر لا کر دکھائے جہاں سے اس نے اقتدار عوام سے چھینا، ترجمان پی ٹی آئی کا ردعمل

لاہور ( نیوز ڈیسک ) ترجمان پی ٹی آئی نے وزیر اعظم کے بجلی سستی کرنے کے اعلان پر کہا ہے کہ مینڈیٹ چور وزیراعظم کی گفتگو جاہلانہ اور جھوٹ کا پلندہ ہے، مہنگائی کو کم کرنے اور معیشت بچانے کا جھوٹ ہانکنے والا مسخرہ بجلی کی فی یونٹ قیمت کو اپریل 2022 کی سطح پر لا کر دکھائے جہاں سے اس نے اقتدار عوام سے چھینا۔ تفصیلات کے مطابق وزیر اعظم شہباز شریف کی جانب سے بجلی سستی کیے جانے کے اعلان پر تحریک انصاف کے ترجمان شیخ وقاص اکرم کی جانب سے ردعمل دیا گیا ہے۔
شیخ وقاص اکرم کا کہنا ہے کہ مینڈیٹ چور وزیراعظم کی گفتگو جاہلانہ اور جھوٹ کا پلندہ ہے، 17 نشستوں کے ساتھ وزارت عظمٰی پر قابض ہونے والے شخص کا 3 سالہ دور اقتدار ملکی تاریخ کا تاریک ترین دور ہے، عوام جانتے ہیں کہ اس بے ایمان ٹولے نے انہیں بدترین غربت، مہنگائی، بیروزگاری، کساد بازاری جبکہ معیشت کو تباہی کی بھینٹ چڑھایا ہے، معیشت کو دیوالیہ ہونے سے بچانے کا بیانیہ 8 فروری 2024 کو عوام نے دفن کرکے ووٹ کی پرچی پر ان کے خلاف تاریخی فیصلہ صادر کیا۔
شیخ وقاص اکرم نے مزید کہا کہ عوام کے مینڈیٹ پر دن دیہاڑے ڈاکہ ڈال کر انہیں فارم 47 کی ناجائز، غاصب اور مجرم حکومت قائم کرنا پڑی، ملک پر اس ناجائز طور پر قابض سرکار کے اقتدار کو بچانے کیلئے ننگی وحشت اور ریاستی جبر استعمال کیا گیا اور یہ سلسلہ جاری ہے، نالائقوں، نااہلوں اور مجرم پیشہ افراد پر مشتمل اس ناجائز حکومت کے تحفظ کیلئے آئین، قانون اور جمہوریت کو موت کے گھاٹ اتارا گیا جبکہ میڈیا کو زنجیروں میں جکڑا گیا، انہی بے ضمیر کٹھ پتلیوں کے اقتدار کو بچانے کیلئے عدلیہ کو 26 آئینی ترمیم کی نکیل ڈال کر عدالتوں کو اندھا، گونگا، بہرہ اور اپاہج بنایا گیا، جھوٹ، فراڈ، بےایمانی، ضمیر فروشی اور ٹاوٹی کا کراہت آمیز سرکس چلانے کیلئے عوام سے تمام بنیادی آئینی، قانونی، جمہوری، سیاسی اور معاشی حقوق غصب کرلئے گئے۔
ترجمان پی ٹی آئی کے مطابق آج ملک میں مجرم، چور، ڈکیٹ اور دہشتگرد آزاد جبکہ عوام، ان کی زندگیاں اور ان کا مستقبل تاریکیوں کی زد میں ہیں، اس بےایمان وزیراعظم میں ہمت اور شرم ہے تو عوام خصوصا بلوچستان اور پختونوا کے کروڑوں پاکستانیوں کو دہشتگردی اور مسلح گروہوں سے نجات کی ضمانت دے۔ بجلی سستی کرنے کے حکومت اعلان پر شیخ وقاص اکرم نے کہا کہ مہنگائی کو کم کرنے اور معیشت بچانے کا جھوٹ ہانکنے والا مسخرہ بجلی کی فی یونٹ قیمت کو اپریل 2022 کی سطح پر لا کر دکھائے جہاں سے اس نے اقتدار عوام سے چھینا، ذرا سی حیا شہباز شریف میں باقی ہے تو میڈیا کو سچ بولنے اور عوام کو پرامن انداز میں سڑکوں پر نکل کر اپنی کارکردگی کے بارے میں اپنی رائے کے اظہار کا موقع دے، بند کمروں میں جھوٹ بول کر اور کنٹرولڈ، مجبور اور بےبس میڈیا پر انہیں نشر کرکے چیری بلاسم عوام کو اپنے اور اپنی ناجائز سرکار کے بارے میں کسی غلط فہمی کا شکار نہیں کرسکتے، اس غاصب ٹولے کا یوم حساب قریب ہے، ملک و قوم کے خلاف اپنے ہر جرم کا پورا حساب دے گا۔